Viwango vinapokuwa vimekamilishwa na kupitishwa na mamlaka husika, huweka mainisho na misingi muhimu ya kuzingatia katika uzalishaji wa bidhaa, utoaji huduma katika maeneo mbalimbali ya jamii na utendaji katika sekta mbalimbali ikiwemo sanaa,utamaduni na maeneo ya urithi.
Ameyasema hayo Kaimu Mkurugenzi Mkuu wa Shirika la Viwango Tanzania (TBS), David Ndibalema kwenye hafla ya Maadhimisho ya Siku ya Viwango Afrika iliyofanyika Makao Makuu ya Shirika hilo Jijini DSM.
Akizungumza katika hafla hiyo Ndibalema amesema kuwa matakwa ya viwango yanazingatia kuwezesha kutolewa kwa bidhaa na huduma bora kwa jamii husika hivyo kulinda afya,usalama na mazingira na hatimaye kuchangia katika uchumi endelevu wa taifa.
“Ni wazi kuwa iwapo utaratibu wa kuandaa viwango utahusisha jamii kisha matakwa yake yakazingatiwa katika nyanja zote husika, viwango vitakuwa na mchango mkubwa katika mapambano dhidi ya changamoto zinazokabili sekta ya sanaa, utamaduni na urithi wetu” Ndibalema.
Aidha, Ndibalema amesema upo utofauti mkubwa katika kukuza uchumi bunifu kwenye sekta ya sanaa utamaduni na urithi wa nchi zinazoendelea ikiwemo Tanzania ukilinganisha na nchi zinazoendelea kwa sababu ya changamoto mbalimbali ikiwemo miundombinu, biashara, fedha na matumizi ya viwango.
Pamoja na hayo Ndibalema amewapongeza waandaji wa shindano la insha kwani ushirikishwaji wa wanachuo ni njia mojawapo ya kueneza uelewa kuhusiana na matumizi ya viwango katika bidhaa na huduma mbalimbali.
Vyuo vilivyoshiriki katika shindano la insha ni vyuo 32 ambapo washindi 10 wamepatikana kutoka vyuo hivyo na kukabidhiwa
zawadi.
