Mwanaume mwenye umri wa miaka 37, Tan Wee Quan James, amehukumiwa kifungo cha wiki tatu baada ya kupatikana na hatia ya kusimamia tovuti tisa za ponografia, akimshirikisha dada yake kwenye biashara hiyo.
Tan alikiri mashtaka mawili ya kushiriki katika biashara ya kuonyesha maudhui ya ponografia hadharani na moja la kumshawishi dada yake kusaidia kusimamia mojawapo ya tovuti hizo. Kwa msaada wake, dada yake alipokea kiasi cha dola za Singapore 60,000 (takriban Shilingi za Kitanzania milioni 108).
Kwa mujibu wa ushahidi mahakamani, Tan alianza kazi hiyo mwaka 2014 baada ya kushawishiwa na mshirika wake, Adrian, aliyekuwa akiunda tovuti hizo. Tan alihusika na ukaguzi wa video zilizopakiwa, kufuta zile zisizofaa, na kufuatilia idadi ya watazamaji. Tovuti hizo zilitoza ada kwa watazamaji na watangazaji, huku Tan akipata sehemu ya faida kutokana na usimamizi wake.
Mnamo mwaka 2020, Tan alimshawishi dada yake kujiunga naye katika kusimamia moja ya tovuti hizo wakati alikuwa na shughuli nyingi. Dada yake alikubali na alihusika mara kwa mara hadi Desemba 15, 2022, alipokamatwa wakati polisi walipovamia makazi ya Tan baada ya kupata taarifa za kijasusi.
Mwendesha mashtaka alisisitiza kuwa adhabu kali ni muhimu ili kulinda jamii, hasa vijana, dhidi ya madhara ya maudhui ya ponografia ambayo yanahusishwa na kuongezeka kwa uhalifu wa kingono miongoni mwa vijana. Aidha, alibainisha kuwa Tan alifaidi kifedha kupitia biashara hiyo haramu.
Adhabu ya kushiriki katika biashara ya kuonyesha maudhui ya ponografia ni kifungo cha hadi miezi mitatu, faini, au vyote kwa pamoja.
