Wanamgambo wanaosadikiwa kuwa wa Boko Haram wamevamia kijiji cha Mafa, kaskazini mashariki mwa Nigeria, na kuua watu wasiopungua 127 katika shambulio la kikatili. Shambulio hilo lilitokea katika jimbo la Yobe, ambalo limekuwa moja ya maeneo yaliyoathirika zaidi na uasi wa kundi hilo kwa zaidi ya miaka 15.
Kwa mujibu wa polisi, wanamgambo hao waliingia kijijini kwa pikipiki, wakafyatua risasi katika soko na kuchoma moto maduka na nyumba. Polisi wa Yobe, Dungus Abdulkarim, alieleza kuwa shambulio hilo lilikuwa ni kulipiza kisasi kufuatia kuuawa kwa wanamgambo wawili wa Boko Haram na wanakijiji waliojipanga kama vikosi vya kujilinda.
Baada ya kushambulia soko na kuchoma majengo, wanamgambo hao waliwafukuza wakazi waliokuwa wakikimbilia msituni na kuwafyatulia risasi. Hata hivyo, idadi kamili ya waliofariki bado haijathibitishwa rasmi.
Afisa mmoja wa kijeshi ambaye aliandamana na kamanda wa jeshi la Yobe kuelekea Mafa alisema walikuta mabomu yametegwa njiani kuelekea kijijini, lakini walifanikiwa kuyaondoa. Mwili wa marehemu 37 ulipatikana na kupelekwa katika Hospitali ya Babangida General.
Mkazi mmoja wa Mafa, Modu Mohammed, alisema kuwa watu kadhaa hawajulikani walipo na alikadiria kuwa idadi ya vifo inaweza kuwa zaidi ya 100, huku miili mingine ikiwa bado ipo msituni.
