Kipa wa Ubelgiji, Arne Espeel (25) amekufa baada ya kudaka mkwaju wa penalti mwishoni mwa wiki iliyopita.
Winkel Sport B, inayocheza ligi daraja la pili ya Magharibi mwa Brabant nchini Ubelgiji, ilikuwa mbele kwa mabao 2-1 dhidi ya Westrozebeke wakati wapinzani wao walipozawadiwa mkwaju wa penalti katika kipindi cha pili.
Kwa mujibu wa taarifa kutoka kwenye vyombo vya habari Ubelgiji, Espeel aliokoa mkwaju huo wa penalti lakini akaanguka chini.
Alipatiwa huduma ya kwanza haraka kumsaidia, lakini ikaripotiwa alifariki muda mfupi akiwa njiani kupelekwa hospitali.
Mechi hiyo ilichezwa uwanja wa nyumbani wa klabu hiyo, “Winkel Sport inaomboleza kifo cha Arne Espeel,” taarifa ya klabu hiyo ilisomeka.
“Tunawapa pole ya dhati familia na marafiki wa Arne katika msiba huu mzito. Soka imepoteza mchezaji mahiri.”
