Marekani itatoa dozi milioni moja za chanjo dhidi ya Mpox kwa nchi za bara la Afrika ambako janga hili linaendelea, Rais Joe Biden ametangaza siku ya Jumanne katika Umoja wa Mataifa huko New York.
“Lazima tuchukue hatua za haraka kukabiliana na janga la Mpox barani Afrika. Tuko tayari kuahidi dola milioni 500 kusaidia nchi za Afrika kukabiliana na janga hili, na sasa tunatoa dozi milioni moja za chanjo ya Mpox,” ametangaza mbele ya Mkutano Mkuu wa Umoja wa Mataifa. “Tunatoa wito kwa washirika wetu kutufuata” kwa ahadi zaidi za michango, amesema pia.
Mpox, ambayo hapo awali iliitwa monkeypox, ni ugonjwa wa virusi ambao huenea kutoka kwa wanyama hadi kwa wanadamu lakini pia hupitishwa kati ya wanadamu wakati wa kuwasiliana kimwili kwa muda mrefu, na kusababisha homa, maumivu ya misuli na vidonda vya ngozi. Wakati mwingine inaweza kuwa mbaya. Kuibuka tena kwa Mpox katika bara na kuonekana kwa lahaja mpya (clade 1b) kulisukuma Shirika la Afya Duniani (WHO) kuanzisha kiwango chake cha juu zaidi cha tahadhari ya kimataifa katikati ya mwezi w Agosti.
Kampeni ya kwanza ya chanjo dhidi ya mMpox ilianza wiki iliyopita nchini Rwanda, kulingana na shirika la afya wa Umoja wa Afrika. Jumla ya kesi 25,093 zinazoshukiwa za ugonjwa wa Mpox na vifo 723 zimeripotiwa barani kote kati ya mwezi Januari na Septemba 8, kulingana na WHO.
