Kuongezeka kwa ghasia za hivi majuzi mashariki mwa Jamhuri ya Kidemokrasia ya Kongo, ambapo waasi wa M23 wamezidisha mashambulizi dhidi ya vikosi vya serikali, kumesababisha kufungwa kwa shule 2,594, mamlaka ilisema Jumatano.
Taarifa iliyotolewa na Wizara ya Elimu ilionyesha kuwa shule 1,483 zimefungwa katika jimbo la Kivu Kaskazini huku 1,111 zimefungwa katika jimbo la Kivu Kusini, na kuathiri watoto milioni 1.1.
“Kurejeshwa kwa shughuli za shule kumekuwa ngumu, huku usalama wa wanafunzi na walimu ukiwa hatarini kutokana na vilipuzi katika shule fulani,” wizara hiyo ilisema.
“Shule nyingi zimeshambuliwa kwa mabomu, kuharibiwa au kubadilishwa kuwa kambi za kijeshi na makundi yenye silaha. Kwa kulenga wanafunzi na shule, vita hivi pia ni vita dhidi ya mustakabali wetu. Katika mkasa ambao haujawahi kushuhudiwa, shule hata iligeuzwa kuwa kaburi, jambo linaloonyesha hali ya kutisha na kukata tamaa ambayo inakumba sekta ya elimu katika maeneo yenye migogoro,” ikaongeza taarifa hiyo.
Kundi la M23 limezidisha udhibiti wa eneo lake mashariki mwa Kongo tangu Desemba, na kutwaa miji mikuu ya majimbo ya Goma na Bukavu.
Mapigano mashariki mwa Kongo yamesababisha vifo vya zaidi ya watu 7,000 mwaka huu, Waziri Mkuu wa Kongo Judith Suminwa Tuluka aliambia Baraza la Haki za Kibinadamu la Umoja wa Mataifa siku ya Jumatatu.
