Mwanaume kutokea Ufaransa mwenye umri wa miaka 71 anayeshtakiwa kwa kumuwekea mke wake dawa za kulevya ili yeye na watu wengi wasiowafahamu waweze kumshambulia kingono aliambia mahakama Jumanne kuwa yeye ni mbakaji, akirejea kizimbani baada ya kuugua kwa takriban wiki moja.
“Mimi ni mbakaji, kama wengine katika chumba hiki,” Pelicot alisema, akimaanisha washtakiwa wengine 50 katika kesi hiyo ya umati — wanaume ambao anadaiwa kuwasajili mtandaoni kumbaka mke wake wa wakati huo Gisele Pelicot.
“Wote walijua” kwamba alikuwa akiwaalika kumbaka, alisema.
Lakini aliongeza: “Hakustahili hii.”
Dominique Pelicot anatuhumiwa kwa kumpa Gisele dawa za kupunguza wasiwasi kwa muda wa takriban muongo mmoja, kuanzia 2011 hadi 2020.
Akiwa amepoteza fahamu, alimbaka na kuwaajiri wanaume wengine kadhaa aliokutana nao mtandaoni kufanya vivyo hivyo.
Dominique Pelicot amekiri mashtaka hayo, lakini Jumanne ni mara yake ya kwanza kuzungumza kwa urefu wowote tangu kesi hiyo ilipoanza kusikilizwa Septemba 2.
