Rais wa Kenya William Ruto ametangaza Ijumaa kuwa sikukuu ya umma kuwaomboleza wahanga wa mafuriko ya hivi majuzi kufuatia mvua na upepo mkali ulionyesha wiki kadhaa.
Mafuriko nchini Kenya yamesababisha vifo vya watu 238 na kuwaacha zaidi ya 200,000 bila makao, kulingana na takwimu za serikali.
Ruto Jumatano alihusisha mafuriko na mabadiliko ya hali ya anga na kuwataka Wakenya kuadhimisha likizo hiyo kwa shughuli za kitaifa za upandaji miti.
“Ninaomba kila Mkenya popote alipo kupanda miti, na inapowezekana kila mmoja apande miti 50 siku ya Ijumaa. Tunalenga kupanda miti milioni 200 siku ya Ijumaa,” Ruto alisema katika mkutano na viongozi wa mashinani.
Ruto pia alitangaza kuwa shule zitafunguliwa Jumatatu baada ya mvua kusababisha baadhi ya shule kujaa maji na zingine kukosa kufikiwa.
Alisema uamuzi huo ulifuata ushauri wa idara iliyokutana kuwa mvua imepungua. Shule zilipangwa kufunguliwa tena wiki iliyopita.
“Tumetoa rasilimali… kwa ajili ya ukarabati wa madarasa na vifaa vingine vya kujifunzia kote nchini Kenya na kwa hivyo shule zote zitafunguliwa Jumatatu wiki ijayo,” alisema.
Mafuriko hayo yameharibu nyumba, barabara, madaraja na miundombinu mingine katika eneo kubwa la uchumi wa Afrika Mashariki.
