Rais wa Ukraine Volodymyr Zelensky amemwambia rais Joe Biden wa Marekani kwamba kuwa kiongozi wa ulimwengu huria inamaanisha pia kuwa kiongozi wa amani.
Kwenye hotuba yake iliyogubikwa na huzuni aliyoitoa kwa bunge la Marekani mapema leo ya kuomba msaada zaidi katika vita dhidi ya Urusi, Zelensky amesema vita hivyo havilihusu tu taifa lake, bali pia vinahusiana na thamani ya Ulaya na ulimwengu wote.
Alimwambia Biden kwamba yeye kama kiongozi wa taifa kubwa, angetamani kumuona anakuwa kiongozi wa ulimwengu, huku akiwaomba wabunge hao kuangazia upya ombi lake la kufungwa anga lake ama Marekani kupeleka ndege za kivita.
Ameongeza katika hotuba hiyo aliyoitoa kwa njia ya video kwamba, Urusi imelibadilisha anga la Ukraine na kuwa chanzo cha vifo vya maelfu ya watu.
