Hong Kong na miji ya kusini mwa China inakabiliwa na mafuriko huku eneo hilo likistahimili baadhi ya mvua kubwa zaidi kuwahi kurekodiwa baada ya kimbunga..
Siku ya Ijumaa, mitaa na vituo vya treni ya chini ya ardhi vilikuwa chini ya maji huko Hong Kong huku maafisa wakifunga shule na sehemu za kazi.
Ofisi ya hali ya hewa ilisema mvua hiyo, iliyoanza Alhamisi, ndiyo kubwa zaidi kukumba jiji hilo katika takriban miaka 140.
Huduma za dharura zilisema zaidi ya watu 100 wamepelekwa hospitalini na uokoaji kadhaa umefanyika.
Picha kutoka katika jiji hilo Alhamisi usiku zilionyesha mvua kubwa iliyonyesha ikigeuza mitaa kuwa mito yenye mafuriko, vituo vya ununuzi vilivyofurika na usafiri wa umma.
Video kwenye mitandao ya kijamii zilionyesha watu wakipanda magari na majukwaa mengine ya juu kutoroka maji, ambayo yamepanda mita kadhaa kwenda juu katika baadhi ya maeneo, na kuziba milango ya njia za chini ya ardhi.
Njia kuu ya bandari ya jiji, njia kuu inayounganisha kisiwa kikuu na peninsula ya Kowloon kaskazini mwake, ilifurika. Mvua hiyo pia ilisababisha maporomoko ya ardhi katika maeneo ya milimani ya Hong Kong – na kuziba baadhi ya barabara kuu.
