Silaha iliyotumika kumuua mmoja wa wasanii wa muziki wa rap nchini Afrika Kusini, maarufu kwa jina la AKA, imepatikana, polisi wamethibitisha.
Kiernan Forbes aliuawa kwa kupigwa risasi mwezi Februari pamoja na rafiki yake wa karibu, mpishi na mjasiriamali Tebello “Tibz” Motsoane, nje ya mgahawa katika mji wa pwani wa Durban.
Ripoti kwamba silaha hiyo ya mauaji ilipatikana ilianza kusambazwa mwezi Mei lakini polisi walikanusha kuwa ni mbaya na haina uthibitisho.
Mkuu wa polisi wa Kwa-Zulu Natal alikataa kutoa taarifa zaidi kuhusu wapi na lini bunduki hiyo iligunduliwa, akisema hilo litahatarisha uchunguzi wao ambao ulikuwa katika “hatua nyeti”.
Bado hakuna aliyeshtakiwa kwa mauaji hayo mawili ambayo yalinaswa kwenye CCTV na kusababisha ghadhabu ya kitaifa.
Polisi walisema chanzo cha kupigwa risasi hakijajulikana, na uchunguzi unaendelea.
Beauty Dlulane, ambaye ni mwenyekiti wa kamati ya bunge kuhusu sanaa na utamaduni, alilaani mauaji ya AKA, na kuyataja kama “pigo”.
Alitoa wito kwa mamlaka “kuwalinda Waafrika Kusini kutokana na janga hili jipya la kile kinachoonekana kuwa kandarasi na mauaji ya kulipiza kisasi ambapo wasanii waigizaji na ma-DJ wanaonekana kulengwa”.
Novemba mwaka jana, nyota wa muziki wa nyumbani amapiano, Oupa Sefoka – anayejulikana kama DJ Sumbody – aliuawa pamoja na mlinzi wake katika ufyatuaji risasi wa gari huko Johannesburg.
Mnamo 2007, vurugu za bunduki nchini Afrika Kusini ziligharimu maisha ya mmoja wa wasanii wa kimataifa wanaopendwa zaidi barani Afrika. Mwimbaji wa reggae Lucky Dube alikuwa akimshusha mwanawe kijana kwenye nyumba ya jamaa yake wakati watu wenye silaha walipompiga risasi tatu karibu wakati wa jaribio la kumteka nyara.
