Jeshi la India limesema wanajeshi 23 walitoweka baada ya mafuriko makubwa yaliyosababishwa na mvua kubwa iliyonyesha kwenye bonde la mbali katika jimbo la milima la Sikkim kaskazini mashariki mwa nchi hiyo.
Jeshi katika taarifa yake siku ya Jumatano, lilifichua kwamba wafanyakazi na baadhi ya magari yalizama chini ya mafuriko.
“Kutokana na mafuriko ya ghafla katika Ziwa Lhonak huko Sikkim Kaskazini, mafuriko makubwa yalitokea katika Mto Teesta… wafanyakazi 23 wameripotiwa kupotea na baadhi ya magari yanaripotiwa kuzama chini ya matope.
“Operesheni za msako zinaendelea,” jeshi lilisema.
Eneo la mbali liko karibu na mpaka wa India na Nepal, na Ziwa Lhonak liko chini ya barafu katika vilele vya theluji vinavyozunguka Kangchenjunga, mlima wa tatu kwa urefu duniani.
Jeshi lilisema maji yaliyotolewa juu ya mto kutoka bwawa la Chungthang yanamaanisha kuwa mto tayari ulikuwa zaidi ya mita 4.5 (futi 15) juu kuliko kawaida.
Video iliyotolewa na msemaji wa jeshi la India ilionyesha mkondo mzito wa maji ya hudhurungi yakifagia kwenye bonde lenye misitu minene, huku barabara zikisombwa na maji na nyaya za umeme zikiwa zimekatika.
Mafuriko ya ghafla ni ya kawaida wakati wa msimu wa monsuni, ambao huanza Juni na kwa kawaida huondoka kutoka bara la Hindi mwishoni mwa Septemba. Kufikia Oktoba, mvua kubwa zaidi ya masika huwa imekwisha.
Wataalamu wanasema mabadiliko ya hali ya hewa yanaongeza mzunguko na ukali wao.
