Jumuiya ya Umoja wa Wanawake wa CCM (UWT), ikiongozwa na Mwenyekiti wake Mary Chatanda na Katibu Mkuu Jokate Mwegelo, leo November 04,2023 imefanya Kongamano la Kumpongeza Rais wa Zanzibar Dkt. Mwinyi kwa kutimiza miaka mitatu tangu awe Rais wa Zanzibar, kongamano hilo limefanyika katika viwanja vya Maisara, Zanzibar.
Akiongea wakati wa kongamano hilo, Jokate amesema “Lengo la UWT kukupongeza ni kutokana na mageuzi makubwa yaliyofanyika katika miradi ya maendeleo ambayo imeleta tija kwa Wananchi wa Zanzibar na kupelekea wewe (Rais Dkt. Hussein Mwinyi ) kuitwa Dkt. Maendeleo “
Kwa upande wake Chatanda amesema “Hatuvunji Katiba na taratibu za Chama lakini tunawaomba radhi sisi tumeshafanya maamuzi, tunawaomba Wanaume wa CCM, Wanachama wa CCM wale wanaokusudia kuokota fomu wasipoteze muda hatutowadhamini safari hii, tutamdhamini Rais Dkt. Samia na Rais Dkt. Mwinyi”
Kongamano hilo limehudhuriwa na Viongozi mbalimbali wa Chama akiwemo Makamu Mwenyekiti wa CCM-Bara Abdulrahman Kinana, Viongozi wa Serikali pamoja na Wadau mbalimbali wa Sanaa wakiwemo Wasanii Zuchu, Makabila na Mrisho Mpoto.
