Wanajeshi wa Israel wamewapiga risasi Wapalestina wawili na kuwajeruhi wengine 11, kwa mujibu wa shirika la habari la Associated Press.
Wapalestina walikuwa wakielekea katika eneo kuu la mapigano kaskazini mwa Gaza, licha ya onyo la jeshi la Israel la kusalia wakati wa usitishaji mapigano kwa muda, iliripoti.
Mwandishi wa habari wa AP aliona miili hiyo miwili na majeruhi walipokuwa wakiwasili katika hospitali katika mji wa Deir al Balah ulioko nusu ya kusini mwa Gaza.
Majeruhi walikuwa wamepigwa risasi miguuni.
Imejiri saa chache baada ya jeshi la Israel kuwaonya Wapalestina waliokimbia makazi yao ambao walitafuta hifadhi kusini wasirudi makwao katika nusu ya kaskazini ya eneo hilo wakati wa mapatano ya siku nne.
Tangu usitishaji vita wa muda uanze leo asubuhi, mamia ya Wapalestina wameonekana wakijaribu kuelekea kaskazini mwa Gaza.
