Mamlaka ya Uchina inachunguza hospitali kuhusu tukio ambapo daktari wa upasuaji anadaiwa kumpiga mgonjwa ambaye alikuwa akimfanyia upasuaji wakati huo.
Ilinaswa kwenye klipu iliyosambaa kwenye mitandao ya kijamii ya Uchina wiki hii, na kuzua hasira mtandaoni.
Kikundi cha wazazi cha hospitali hiyo, Aier China, kimemsimamisha kazi daktari wa upasuaji na kumfukuza kazi Mkurugenzi Mtendaji wa hospitali ambayo tukio hilo lilitokea mnamo 2019.
BBC imewasiliana na Aier China kwa maoni. Video hiyo inaonekana ikionyesha daktari huyo wa upasuaji akimpiga mgonjwa ngumi ya kichwa angalau mara tatu wakati wa kumfanyia upasuaji macho.
Aier China, ambayo inaendesha msururu wa hospitali za macho, ilisema tukio hilo lilitokea wakati wa operesheni katika hospitali yake huko Guigang, mji wa kusini magharibi mwa Uchina.
Mgonjwa alikuwa mwanamke mwenye umri wa miaka 82 na “wakati wa upasuaji, kutokana na anesthesia ya ndani, mgonjwa alikuwa na kutovumilia”. Alisogeza kichwa na mboni za macho mara nyingi, kulingana na taarifa yao.
Kwa vile mgonjwa angeweza tu kuzungumza lahaja ya kienyeji na hakuonekana kujibu maonyo ya daktari katika Mandarin, daktari wa upasuaji “alimtibu mgonjwa katika hali ya dharura”. Mamlaka za eneo hilo zinasema mgonjwa huyo alipata michubuko kwenye paji la uso wake.
Baada ya upasuaji huo, wasimamizi wa hospitali hiyo waliomba msamaha na kulipa Yuan 500 ($70, £55) kama fidia, kulingana na mtoto wa mgonjwa ambaye alizungumza na vyombo vya habari vya ndani. Pia alisema mama yake kwa sasa ni kipofu katika jicho lake la kushoto, japo haijafahamika iwapo ni kutokana na tukio hilo.
Aier China ilisema hospitali hiyo ilishindwa kuripoti tukio hilo kwa makao makuu. Siku ya Alhamisi ilitangaza kufutwa kazi kwa Mkurugenzi Mtendaji wa hospitali ya Guiyang na kusimamishwa kazi kwa daktari wa upasuaji – ambaye pia ni mkuu wa hospitali – kwa “ukiukaji mkubwa wa kanuni za kikundi”, ambayo ni pamoja na makosa mengine ambayo hayajabainishwa.
Ingawa tukio hilo lilitokea Desemba 2019, lilijulikana kwa umma wiki hii baada ya daktari mashuhuri wa China, Ai Fen, kushiriki picha za CCTV za upasuaji huo.
Dk Ai, ambaye alikuwa miongoni mwa kundi la madaktari waliotahadharisha umma kuhusu mlipuko wa awali wa Wuhan Covid, alikuwa amechapisha kipande hicho kwenye akaunti yake ya Weibo ambapo ana wafuasi zaidi ya milioni mbili.
Dk Ai amejiingiza katika mabishano ya kisheria na Aier China tangu 2021 alipoenda kufanyiwa upasuaji katika mojawapo ya hospitali zao. Amedai alikaribia kuwa kipofu katika jicho moja kutokana na upasuaji huo, lakini Aier China imekanusha madai hayo.
