NCBA Bank na The Breakfast Golf Community washerehekea mchango wa kipekee wa Ali Mfuruki na Profesa Mohabe Nyirabu kupitia mashindano ya The Memorial Golf Tournament
Benki ya NCBA, kwa kushirikiana na The Breakfast Golf Community, hii leo kwa heshima kubwa wamekumbuka mchango wa kipekee wa wapendwa wawili, Ali Mfuruki na Profesa Mohabe Nyirabu, kupitia mashindano ya The Memorial Golf Tournament, yaliyofanyika klabu ya golf ya Lugalo.
Ali Mfuruki na Profesa Mohabe Nyirabu walikuwa miongoni mwa wanachama waanzilishi wa awali wa The Breakfast Golf Community. Wote walikuwa wachezaji mahiri wa golf wenye maono ambayo walipata muda wa kuyatimiza licha ya ratiba zao, na majukumu mengine.
Profesa Mohabe Nyirabu alikuwa mwalimu mashuhuri na aligusa wengi kupitia mafunzo yake katika Chuo kikuu cha Dar es Salaam. Alipokuwa Profesa wa Sayansi ya Siasa na Utawala wa Umma, alifundisha kuhusu jinsi ya kuboresha vyama vya siasa na mchakato mzima wa uchaguzi.
Licha ya harakati zake za kitaaluma, Profesa Nyirabu alipenda kutumia muda wake kwenye uwanja wa golf, huku akifurahia kutoa dondoo za mchezo aupendao kwa wanachama wanaochipukia kwenye mchezo huo.
Na sio tu maono na mchango wao ulifanana, hata historia ya chimbuko lao ni pacha! Watani hawa walizaliwa kando mbili tofauti za ufuo wa Ziwa Victoria.
Mashindano ya The Memorial Golf Tournament, yalitumika kuweka alama ya heshima na kumbukumbu kwa watu hawa mashuhuri.
Bwana Femin Mabachi, Bwana Gilman Kasiga, Mwenyekiti wa chama cha golf cha Tanzania, na Claver Serumaga, mkurugenzi mtendaji wa NCBA Tanzania, walikuwa miongoni mwa wageni waalikwa, waliokusanyika kwa heshima ya Ali Mfuruki na Profesa Mohabe Nyirabu kupitia mchezo walioupenda sana.
Benki ya NCBA inatoa shukrani zake za dhati kwa The Breakfast Golf Community, kwa ushirikiano wao na kujitolea kwao katika kuandaa tukio hili la kumbukumbu. Mafanikio ya The Memorial Golf Tournament, yamethibitisha umuhimu wa Kuwaenzi wapendwa wetu waliotutangulia na alama walizoziacha kwenye jamii.
