Wanasema moto usikie kwa wenzako tu……… na ni kweli, ukijaribu kuvaa viatu vya hawa Wapangaji utaona ni vizito kiasi gani usiku wa leo, walitoka zao asubuhi kwenda mihangaikoni kujitafutia rizki na jioni hii watarudi nyumbani kwao na kukuta vyumba vyote 11 walivyopangishiwa vimeteketea kwa moto.
Tukio hili limetokea maeneo ya Tabata Kisiwani Jijini Dar es salaam kwenye nyumba ya kupanga ya Mama Amina yenye Wapangaji zaidi ya 11 ambayo ilianza kuwaka moto majira ya saa moja usiku huku chanzo kikitajwa kuwa ni shoti ya umeme iliyoanzia kwenye moja ya vyumba hivyo.
Moto huo tayari umezimwa usiku huu na hakuna madhara yoyote yaliyotokea kwa Binaadamu isipokuwa mali zote zilizokuwemo ndani zimeteketea kutokana na mazingira ya kuziokoa kuwa magumu.
