Jeshi la Israel limesema limewazuilia watu 100 wanaoshukiwa kuwa wanamgambo wa Hamas katika uvamizi dhidi ya hospitali moja kaskazini mwa Gaza mwishoni mwa juma, huku ndege zake za kivita siku ya Jumatatu zikituma moshi mwingi juu ya mji wa bandari wa Tiro, kusini mwa Lebanon.
Vikosi vya Israel vilivamia Hospitali ya Kamal Adwan huko Beit Lahiya siku ya Ijumaa, na kuwazuilia wafanyakazi wa kiume 44, kulingana na Shirika la Afya Ulimwenguni. Maafisa wa afya wa Palestina walisema hospitali hiyo, ambayo ilikuwa ikiwahudumia wagonjwa wapatao 200, iliharibiwa pakubwa katika uvamizi huo.
Israel imevamia hospitali kadhaa huko Gaza katika kipindi cha vita vya mwaka mzima, ikisema Hamas na wanamgambo wengine wanazitumia kwa madhumuni ya kijeshi. Maafisa wa afya wa Palestina wanakanusha madai hayo na wanalishutumu jeshi kwa kuhatarisha raia bila kujali.
Jeshi la Israel limetoa wito kwa Wapalestina kuhama kaskazini mwa Gaza, ambako limekuwa likifanya mashambulizi makubwa kwa zaidi ya wiki tatu. Umoja wa Mataifa ulisema mapema mwezi huu watu wasiopungua 400,000 bado wako kaskazini mwa Gaza na njaa imekithiri huku kiasi cha misaada ya kibinadamu inayofika kaskazini ikipungua katika mwezi uliopita.
Mashambulizi ya Israel huko Gaza yameua zaidi ya Wapalestina 43,000, kulingana na mamlaka ya afya ya eneo hilo, ambao hawatofautishi kati ya wanamgambo na raia, lakini wanasema zaidi ya nusu walikuwa wanawake na watoto. Vita kati ya Israel na Hamas vilianza baada ya wanamgambo wanaoongozwa na Hamas mnamo Oktoba 7, 2023, kutoboa mashimo katika uzio wa usalama wa Israel na kuvamia, na kuua takriban watu 1,200 – wengi wao wakiwa raia – na kuwateka nyara wengine 250.
Wizara ya Afya ya Lebanon inasema jumla ya idadi ya watu waliouawa katika mwaka uliopita ni zaidi ya 2,600 na kujeruhiwa 12,200. Mapigano nchini Lebanon yamewafukuza watu milioni 1.2 kutoka makwao, wakiwemo watoto zaidi ya 400,000, kulingana na shirika la Umoja wa Mataifa la kuhudumia watoto. Mashambulizi ya Israel yameua viongozi wengi wa juu wa Hezbollah tangu mapigano yalipoongezeka mwezi Septemba.
