Takriban Wapalestina wengine 37 wameuawa katika mashambulizi ya Israel huko Gaza, na kufanya jumla ya vifo tangu mwaka jana hadi 45,436, Wizara ya Afya katika eneo hilo ilisema.
Taarifa ya wizara hiyo iliongeza kuwa wengine 108,038 walijeruhiwa katika shambulio hilo linaloendelea.
“Vikosi vya Israel viliua watu 37 na kujeruhi wengine 98 katika mauaji matatu ya familia katika saa 24 zilizopita,” wizara hiyo ilisema.
Sambamba na hayo Jeshi la Israel lilitangaza kwamba askari mkuu katika kikosi chake maalum aliuawa kaskazini mwa Gaza.
Jumla ya wanajeshi 391 wa Israel wameuawa tangu kuanza kwa uvamizi wa ardhini katika mzingiro wa Gaza mwezi Oktoba mwaka jana.
