Mwenyekiti wa Chama Cha Mapinduzi (CCM) Mkoa wa Tanga, MCC Rajabu Abdalah, ametoa agizo kwa kila wilaya kuhakikisha inatekeleza mpango wa kujenga nyumba za watumishi wa chama na jumuiya zake kwa mwaka huu.
Akizungumza wilayani Pangani alipokuwa akikagua ujenzi wa nyumba ya Katibu wa CCM wa wilaya hiyo pamoja na jumuiya zake, Mwenyekiti Rajabu alisema lengo la ziara yake ni kuona maendeleo ya miradi ya chama na serikali, pamoja na changamoto zinazohitaji ufumbuzi.
Akitilia mkazo umuhimu wa ubunifu miongoni mwa viongozi wa chama, alisema:
“Ukiwa kiongozi lazima uwe mbunifu. Ndani ya chama tunahitaji watu wabunifu. Mimi nimeshaongoza njia, siyo unafika mahali unauliza hapa tunakwenda wapi ikiwa umeshasafishiwa njia.”
Kwa mujibu wa mpango huo, kila wilaya ya kichama katika Mkoa wa Tanga inapaswa kujenga nyumba nne: nyumba ya Katibu wa CCM wa wilaya, Katibu wa UVCCM, Katibu wa UWT, na Katibu wa Wazazi. Kwa wilaya tisa za Mkoa wa Tanga, jumla ya nyumba zinazopaswa kujengwa ni 36.
Ziara ya Mwenyekiti Rajabu katika wilaya zote za mkoa huo ni sehemu ya ufuatiliaji wa utekelezaji wa miradi ya maendeleo, ikiwa ni mwendelezo wa maadhimisho ya kuzaliwa kwa CCM.
