Rais wa Korea Kusini aliyeondolewa madarakani Yoon Suk-yeol amefikishwa mahakamani kwa ajili ya kusikilizwa ambapo mawakili wake walipinga kukamatwa kwake kwa shtaka la uhalifu wakidai alikuwa akipanga uasi wakati alipoweka sheria ya kijeshi kwa muda mfupi mwezi Desemba.
Usalama uliimarishwa siku ya Alhamisi msafara wa magari uliokuwa ukimsafirisha Yoon ukiwasili katika Mahakama ya Wilaya ya Kati ya Seoul, na makumi ya wafuasi wake walikusanyika karibu.
Usikilizaji wa awali utahusisha majadiliano ya mashahidi na maandalizi mengine ya kesi yake ya jinai, na mahakama pia ilipaswa kupitia ombi la mawakili wa Yoon la kufuta kukamatwa kwake na kuachiliwa kutoka rumande. Changamoto kama hizo hufanikiwa mara chache.
Yoon alishtakiwa Januari 26 kwa shtaka la uasi ambalo linaweza kuwa na adhabu ya kifo au kifungo cha maisha jela. Nchini Korea Kusini, marais wana kinga dhidi ya mashitaka mengi ya jinai, lakini si kwa mashtaka ya uasi au uhaini.
Shtaka hilo linadai kuweka kwake sheria ya kijeshi ilikuwa jaribio haramu la kulifunga Bunge na kuwakamata wanasiasa na wasimamizi wa uchaguzi. Mhafidhina Yoon amesema tamko lake la sheria ya kijeshi lilikusudiwa kuwa onyo la muda kwa upinzani wa kiliberali na kwamba alikuwa amepanga kila mara kuheshimu matakwa ya wabunge ikiwa watapiga kura kuondoa hatua hiyo.
