Dominant Masumbuko (13) Mwanafunzi wa Darasa la saba katika shule ya msingi Mbabani kata ya Mtakuja Halmashauri ya Mji wa Geita Mkoani Geita amefariki Dunia wakati akijaribu kuogelea kwenye Bwawa la Maji lililopo eneo la Mtaa wa Mtakuja.
Akizungumza kwa Masikitiko Makubwa Kaka wa Marehemu aliyefahamika kwa Jina la Ngereja Masalu Mkazi wa Kata ya Mbabani amesema tukio hilo limetokea wakati yeye alipokuwa ameenda kazini kwake huku akisema chanzo cha Mdogo wake kufariki ni uwepo wa lambo katika eneo hilo ambalo linahatarisha Maisha ya watu.
“Tukio lilitokea nikiwa kazini nafanya kazi kwenye Mapulanti nilitokaga muda wa saa Saba nyumbani nikaelekea kazini baada ya kwenda kazini nilipigiwa simu nyumbani hapo kwamba tukio limetokea huku mdogo wako ameangukia kisimani nikauliza kisima gani pale kwenye lambo lililochimbwa na Serikali , ” Kaka wa Marehemu Ngereja Masalu.
Kwa Upande wake Mwenyekiti wa Serikali ya Mtaa wa Mbabani Bw Daudi Zawayo ametumia fursa hiyo kwa kuwataka wazazi na walezi kutowaruhusu watoto wao kwenda kufua nguo karibu na mashimo yenye maji yaliyo Karibu na Makazi ya Watu.
Kamanda wa Jeshi la Zimamoto na Uokoaji Mkoani Geita Hamisi Shabani Dawa amethibitisha kutokea kwa tukio hilo huku akisema chanzo ni kuzama kwenye maji wakati alipokuwa akiogelea katika Bwawa lililopo eneo la Karibu na Makazi ya watu.
