Staa Naseeb Abdul, almaarufu kama Diamond Platnumz’ ameshinda Tuzo ya msanii bora kutokea barani Afrika (Best African Act) katika Tuzo za Muziki za MTV barani Ulaya (MTV EMA) kwa mwaka 2023.
Diamond ameipeperusha vyema bendera ya Tanzania baada ya kuibuka mshindi dhidi ya wasanii wengi mashuhuri kutokea barani Africa hususani nchini Nigeria kama vile Asake na Burna Boy ambao muziki wao umeonekana kung’ara kwenye safu za kimataifa huku kukiwa na wasanii wengine katika kinyang’anyiro hicho kama Libianca na Tyler ICU wa Africa Kusini.
Orodha ya washindi wote wa tuzo hizo ilitangazwa jana kupitia tovuti ya waandaaji wa Mtv huku Tarehe 19 Oktoba 2023, Paramount Global kutangaza kuhairishwa kwa hafla ya utoaji wa tuzo hizo kutokana na vita vya Israel–Hamas mwaka huu pamoja na tahadhari kubwa ya ugaidi nchini Ufaransa na vitisho vya usalama katika viwanja vya ndege.
Licha ya hayo, upigaji kura uliendelea kuwa wazi kwanzia tarehe 31 Oktoba na wasanii walioshinda, ambao walifichuliwa jana tarehe 5 Novemba, watapokea tuzo zao tarehe ya baadae.
Mwaka 2021 msanii Rayvanny aliweka rekodii baada ya kuwa msanii wa kwanza kutokea barani Afrika kutumbuiza katika tuzo akiwa na staa Maluma waliofanya wote ngoma yao pendwa ya Tetema, huku mwaka jana Zuchu alitangazwa kuwa mmoja wa watakaowania tuzo hizo ila kwa bahati mbaya hakushinda.
