Mtawala wa kijeshi wa Niger Jenerali Abdourahamane Tiani siku ya Alhamisi alikutana na viongozi wenzake nchini Mali na Burkina Faso katika ziara zake za kwanza za kimataifa tangu kutwaa mamlaka mwezi Julai.
Majirani wa Niger Mali na Burkina Faso ambazo zinatawaliwa na viongozi wa kijeshi walionyakua mamlaka mwaka 2020 na 2022 mtawalia wameahidi mshikamano na viongozi wa mapinduzi ya Niger.
Tiani aliwasili Burkina Faso Alhamisi jioni kwa “ziara ya urafiki na kikazi” na Kapteni Ibrahim Traore.
Wawili hao walijadili “maswala ya kawaida kwa nchi zote mbili, haswa mapambano dhidi ya ugaidi na maendeleo ya kijamii na kiuchumi”, kulingana na taarifa kutoka kwa rais wa Burkina.
Mjini Bamako mapema siku hiyo, alikuwa amemshukuru mwenzake wa Mali Kanali Assimi Goita kwa “msaada na uamuzi wa mamlaka ya Mali na watu kufanya kazi na mamlaka na watu wa Niger, bila kujali vikwazo”.
Nchi hizo tatu za Sahel mnamo Septemba zilitia saini makubaliano ambayo yanajumuisha vifungu vya ulinzi wa pande zote katika tukio la shambulio la “uhuru na uadilifu wa eneo” la nchi yoyote kati ya hizo.
Akiwa Mali, Tiani alisema lengo la muungano huo ni kubadilisha eneo la Sahel kutoka “eneo la ukosefu wa usalama” hadi “eneo la ustawi”.
Viongozi hao pia wanapanga kuimarisha uhusiano wa kiuchumi na Tiani aliwashukuru majirani zake kwa kusimama pamoja na nchi yake baada ya washirika wa kikanda na Magharibi wa Niger kutangaza msururu wa vikwazo dhidi yake kufuatia mapinduzi hayo.
