Kufuatia amri ya kutotoka nje usiku na maandamano ya wiki kadhaa, upigaji kura ulianza kwa utulivu Alhamisi asubuhi, kwa mujibu wa waandishi wa habari wa AFP, huku wapiga kura wakitoka katika maeneo ya kupigia kura ya kawaida, vidole gumba vyao vikiwa na wino wa kijani na dhahabu usiofutika.
Kura zimepangwa kusalia wazi hadi 05:00 jioni (1400 GMT), lakini inabakia kuonekana kama wapiga kura wanaoegemea upande wa upinzani watatii wito wa wagombea wao wa kusalia nyumbani.
“Ninapiga kura, lakini tunajua hii sio kawaida,” Eugene Rakatomalala mwenye umri wa miaka 43 alisema. “Hakukuwa na wagombeaji wowote ambao walifanya kampeni.”
Rais aliyeko madarakani Andry Rajoelina, amepuuzilia mbali shutuma na kueleza imani yake kuwa atafanikiwa kuchaguliwa tena katika duru ya kwanza ya upigaji kura.
Yeye ni mmoja wa wagombea 13 kwenye kura, lakini 10 kati ya wengine wametoa wito kwa wapiga kura kukataa uchaguzi, wakilalamikia “mapinduzi ya kitaasisi” yaliyompendelea Rajoelina.
“Tunatoa wito kwa kila mtu kutopiga kura. Masharti ya uchaguzi wa rais wa uwazi, yanayokubaliwa na wote, hayajafikiwa,” Roland Ratsiraka, mmoja wa wagombea waliokuwa wakiandamana, alisema Jumanne.
Tangu mapema Oktoba, kundi la upinzani — ambalo linajumuisha marais wawili wa zamani – limeongoza karibu kila siku, maandamano ambayo hayajaidhinishwa katika mji mkuu.
Wamekuwa wakitawanywa mara kwa mara na polisi wanaofyatua mabomu ya machozi.
Kundi la upinzani limeapa kuendelea na maandamano hadi uchaguzi wa haki ufanyike.
Taifa hilo la kisiwa cha Bahari ya Hindi ndilo linaloongoza kwa uzalishaji wa vanila duniani lakini pia mojawapo ya nchi maskini zaidi duniani, na limetikiswa na migogoro ya kisiasa mfululizo tangu uhuru kutoka kwa Ufaransa mwaka 1960.
