Mbunge wa Jimbo la Makambako Mkoani Njombe Deo Sanga (Jah People) amesema Kijana yeyote ambaye atahitaji kuoa au kuolewa ofisi yake itamchangia fedha ili kumuunga mkono katika kufanikisha ndoa yake lengo ikiwa ni kuhamasisha utaratibu mzuri wa kuoana pamoja na kuongeza idadi ya Watu Mkoani humo.
Amesema hayo wakati akiongea na Wananchi wa Kijiji cha Mawande kilichopo Kata ya Utengule ambapo amesema ili kupata fedha kila Kijana mwenye dhamira hiyo anapaswa kutoa taarifa rasmi kwa Viongozi wa Serikali za Vijiji vyao na kwenda katika ofisi yake kupata fedha hiyo.
“Kwa kila Kijana anayetaka kuoa ama kuolewa katika Jimbo langu nitamchangia kiasi cha Tsh. Laki moja na anayetaka kutoa mahari nitamchangia Tsh. Elfu 50 kupitia kampuni yangu ya Jah People, pelekeni kadi au uthibitisho wa matukio hayo kutoka kwa Mwenyekiti wa Serikali ya Mtaa au Kijiji kwenye kituo changu cha mafuta mtakutana na Mtu anaitwa Neto atatoa mchango wangu”
Ikumbukwe kuwa Mbunge huyo hajaanza sasa kutoa fedha hizo kwa Vijana wanaohitaji kufunga ndoa ambapo amesema jambo kubwa linalofanyika ni uboreshaji kwenye namna ya utoaji wa fedha kutokana na shughuli nyingi alizonazo.
