Jina la Mpoki limeongezwa kwenye orodha ya Watanzania ambao wamejitokeza kuchukua fomu za kuomba ridhaa ya Chama cha Mapinduzi (CCM) kugombea Ubunge.
Mchekeshaji huyu ambaye pia ni Mtangazaji, amechukua fomu ya kuwania Ubunge kwenye jimbo la Kigamboni Dar es salaam na sasa anakuwa kwenye orodha moja ya waliotangaza nia Kigamboni akiwemo Paul Makonda, Mkuu wa Mkoa wa Dar es salaam aliyepita ambaye jana amechukua fomu pia.
Mpaka sasa waliotia nia kwenye Chama cha Mapinduzi CCM ni zaidi ya Watu elfu nane (8000) ambapo Dar es salaam ndio inaongoza na mpaka leo alfajiri ilikua ina Watu 829 waliotia nia, Arusha 320, Kusini Unguja 53, Kilimanjaro 82, Kagera 328 na kufanya watia nia kwenye Majimbo kuwa 6533, Viti maalum 1539 na Wawakilishi 133.
Mpoki anaingia kwenye orodha ya Watu wengine maarufu ambao wametangaza nia za kugombea Ubunge akiwemo Mwigizaji Steve Nyerere, Producer Master J, Miss Tanzania 2014 Lillian Kamazima, Mwigizaji wa zamani Simon Simalenga, Mtangazaji/Mwigizaji Mwijaku, Mwigizaji wa zamani Chuma wa Kaole, Mwigizaji/MC Dr. Cheni, Msanii wa Hiphop Bonta, Meneja Hamisi Taletale, Mtangazaji Baruani Muhuza na Mwigizaji Mchopanga.
