July 26, 2018 Mtoto mmoja ambaye ni Mwanafunzi wa darasa la tano amepoteza maisha katika ajali ya moto uliounguza mabweni ya shule ya St. Joseph Rutabo iliyopo wilaya ya Muleba mkoani Kagera.
Kamanda wa Polisi Kagera Augustine Ollom akiwa eneo la tukio amaesema moto huo umeanza kuwaka kuanzia majira ya saa tisa usiku na umeunguza mabweni matatu ambapo ndani yake walikuwemo wanafunzi 154 na kati yao mwanafunzi mmoja amepoteza maisha.
Kamanda Ollom amesema hilo ni tukio la pili baada ya bweni lililoungua miezi miwili iliyopita na amemtaja mtoto aliyefariki kuwa ni GARATINUS GODFREY ana miaka 13 mwanafunzi wa darasa la tano, pamoja na hilo amewaomba wanafunzi na wazazi kuwa watulivu wakati wakiendelea na uchunguzi wa chanzo cha moto huo.
