Malori yaliyokuwa yamebeba misaada ya kibinadamu kwa Gaza iliyokumbwa na vita na kuzingirwa yalianza kupita kwenye kivuko cha mpaka cha Rafah kutoka Misri Jumamosi, chanzo cha usalama na afisa wa Hilali Nyekundu wa Misri aliiambia AFP.
Televisheni ya taifa ya Misri ilionyesha malori kadhaa yakiingia langoni katika siku ya 15 ya vita kati ya Israel na Hamas, vuguvugu la wanamgambo linalotawala eneo la Palestina lenye watu milioni 2.4.
Israel imekuwa ikishambulia kwa mabomu Gaza tangu shambulio la kushtukiza la umwagaji damu la Hamas mnamo Oktoba 7.
Kundi hilo la Kiislamu lilivamia Israel kutoka Ukanda wa Gaza na kuua takriban watu 1,400, wengi wao wakiwa ni raia waliopigwa risasi, kukatwa viungo vyake au kuteketezwa hadi kufa katika siku ya kwanza ya uvamizi huo, kwa mujibu wa maafisa wa Israel, pia walichukua zaidi ya watu 200 mateka.
Israel imetangaza kuzingirwa kwa jumla kwa Gaza na kukata usambazaji wa maji, umeme, mafuta na chakula, na kusababisha uhaba wa kudumu.
Rafah ndiyo njia pekee ya kuingia Gaza ambayo haidhibitiwi na Israel, ambayo ilikubali kuruhusu msaada kutoka Misri kufuatia ombi la mshirika wake mkuu Marekani.
Malori 20 kutoka Hilali Nyekundu ya Misri, ambayo ina jukumu la kupeleka misaada kutoka kwa mashirika mbalimbali ya Umoja wa Mataifa, yaliingia katika kituo cha Misri, mwandishi wa AFP alisema.
Katibu Mkuu wa Umoja wa Mataifa Antonio Guterres siku ya Ijumaa alitembelea upande wa Misri wa kivuko ili kusimamia maandalizi ya utoaji wa misaada.
