Mwanadiplomasia mkuu wa China Wang Yi anazuru Urusi kwa mazungumzo ya usalama, huku Moscow ikitaka kuendelea kuungwa mkono kwa vita vyake dhidi ya Ukraine.
Mshirika wa karibu wa Moscow, Beijing anatuhumiwa kuunga mkono Urusi kwa njia isiyo ya moja kwa moja wakati wa vita, jambo ambalo inakanusha.
Ziara yake inakuja baada ya mkutano wa Vladimir Putin na Kim Jong Un wa Korea Kaskazini ambao ulifikiriwa kupata makubaliano ya silaha.
Vyombo vya habari vya Urusi vilisema kuwa safari ya Bw Wang pia ingeweka msingi kwa Bw Putin kufanya ziara ya kihistoria Beijing hivi karibuni.
Mapema mwezi huu Bw Putin alisema alitarajia kukutana na Rais wa China Xi Jinping, lakini hakusema ni lini.
Hajasafiri nje ya nchi tangu Mahakama ya Kimataifa ya Uhalifu ilipotoa kibali cha kukamatwa kwake mwezi Machi kutokana na uhalifu wa kivita nchini Ukraine. Bw Putin alijitosa katika nchi za kigeni mnamo Desemba 2022 alipotembelea Belarus na Kyrgyzstan.
Wizara ya mambo ya nje ya China ilisema Bw Wang yuko nchini Urusi kwa siku nne kwa “mashauriano ya kimkakati ya usalama”.
Shirika la habari la Urusi Tass, likitoa mfano wa Kremlin, lilisema atakutana na mwenzake wa Urusi Sergei Lavrov na vita vya Ukraine vitakuwa mada kuu ya mazungumzo yao.
Pia watajadili “upanuzi wa vikosi vya Nato na miundombinu katika eneo la Asia-Pasifiki” na kuimarisha uratibu wao katika vikundi vya kimataifa kama vile UN, ilisema.
