Kundi la Benki ya Dunia lilisema Jumanne kwamba zaidi ya nusu ya wakazi wa Gaza wako kwenye ukingo wa njaa, wakiwemo watoto na wazee.
Shirika hilo la kimataifa limetoa wito wa kuchukuliwa hatua za haraka kuokoa maisha.
“Tunaungana na jumuiya ya kimataifa katika kutoa wito wa upatikanaji wa haraka, bure, na usiozuiliwa wa vifaa vya matibabu, chakula na huduma muhimu kwa maisha kupitia njia zote zinazopatikana kwa kasi na kiwango kwa watu wa Gaza,” ilisema katika taarifa.
Bodi ya wakurugenzi ya Kundi la Benki ya Dunia mwezi Disemba iliidhinisha ahadi ya dola milioni 35 kama fedha kwa washirika wa maendeleo ambao wanafanya kazi huko Gaza, ikiwa ni pamoja na Mfuko wa Umoja wa Mataifa wa Kuhudumia Watoto (UNICEF), Mpango wa Chakula Duniani (WFP) na Shirika la Afya Duniani (WHO). .
Fedha hizi ni pamoja na mfuko wa dola milioni 10 kwa WFP kununua vifurushi vya chakula na vocha kufikia wastani wa watu 377,000.
Israel imefanya mashambulizi makali ya kijeshi kwenye Ukanda wa Gaza tangu shambulio la kundi la wapiganaji wa Palestina Hamas Oktoba mwaka jana, ambalo liliua karibu watu 1,200.
Zaidi ya Wapalestina 31,800, wengi wao wakiwa wanawake na watoto, wameuawa huko Gaza, na karibu 74,000 kujeruhiwa huku kukiwa na uharibifu mkubwa na uhaba wa mahitaji.
