Jeshi la Polisi Kanda Maalum ya Dar es Salaam limewauwa watuhumiwa watatu wa unyang’anyi wa kutumia silaha na kupata silaha mbili na risasi 17.
Taarifa iliyotolewa na Kamanda wa Kanda Maalum ya Dar es Salaam ASP Jumanne Muliro imesema kuwa tukio hilo limetokea Juni 24, 2022 majira ya saa 6:45 mchana eneo la Goba Tegeta A, Wilaya ya Ubungo kwenye duka la miamala ya kifedha eneo lililofahamika kama Skymart Mini supermarket.
Amesema kundi la majambazi wanne wakiwa na pikipiki na silaha za moto walifika eneo hilo kwa lengo la kuvamia na kupora fedha katika duka hilo. “Taarifa zilitolewa haraka na askari Polisi walipofika eneo hilo walianza kushambuliwa kwa risasi .
Aidha amesema katika mazingira hayo askari namba F3625 SGT Eliamini alijeruhiwa kwa risasi chini ya bega karibu na kifua. “Majambazi nao walishambuliwa na kujeruhiwa vibaya, ambapo walipelekwa haraka hospitali lakini kwa bahati mbaya watatu wamepoteza maisha na mmoja alitoroka.
