Serikali ya Tanzania imezindua rasmi Sera mpya ya Elimu na Mafunzo ya Mwaka 2014 toleo la 2023, hatua inayolenga kuleta mageuzi makubwa katika sekta ya elimu. Uzinduzi huo ulifanyika jijini Dodoma chini ya uongozi wa Mheshimiwa Rais Dkt. Samia Suluhu Hassan, na kuhudhuriwa na wadau mbalimbali wa elimu. Kwa kauli mbiu ya “Elimu na Ujuzi Ndio Mpango Mzima,” sera hii inalenga kuondoa changamoto zilizokuwepo na kuweka mkazo zaidi katika elimu ya vitendo (amali) ili kuwasaidia vijana kujiajiri na kuajiri wenzao.
Wadau wa Elimu Wapongeza Sera Mpya
Profesa Nuhu Hatibu, Mkurugenzi wa Shule ya Sekondari ya Arusha Science, ni miongoni mwa wadau waliohudhuria uzinduzi huo. Anasema sera hii ni mkombozi kwa vijana kwani inawapa fursa ya kujifunza ujuzi wa vitendo unaowawezesha kuingia moja kwa moja kwenye soko la ajira.
“Tunampongeza Mheshimiwa Rais kwa sera hii mpya. Sasa kazi inaanza kwa watu wote waliopo kwenye sekta ya elimu. Elimu ya amali ina faida kubwa, ikiwemo kuvutia wawekezaji wa viwanda na uzalishaji nchini,” alisema Profesa Nuhu.
Anaeleza kuwa Tanzania ina rasilimali nyingi kama madini, lakini bado inategemea bidhaa kutoka nje, mfano dhahabu inayosafirishwa nje huku magari na pikipiki zikinunuliwa kutoka mataifa ya kigeni. Kupitia sera hii mpya, anasema ni wakati wa kutumia elimu ya amali kuzalisha bidhaa ndani ya nchi.
Arusha Science Yaonyesha Mfano
Shule ya Arusha Science tayari imeanza kutekeleza dhana ya elimu ya vitendo. Kwa mujibu wa Profesa Nuhu, shule hiyo imeanzisha kitengo maalum cha kufundisha wanafunzi kutengeneza magari tangu kidato cha kwanza. Hadi sasa, wanafunzi wa shule hiyo wamefanikiwa kutengeneza magari yanayotumia nishati ya jua na umeme, ambayo yana uwezo wa kusafiri hadi kilomita 80.
Mbali na hilo, wanafunzi wa shule hiyo wameweza kuanzisha kampuni za mtandaoni zinazotatua changamoto mbalimbali katika jamii. Pia, wamefanikiwa kushinda mashindano ya kisayansi kimataifa, jambo linalothibitisha kuwa elimu ya amali ina manufaa makubwa.
Sera mpya ya elimu inaleta matumaini makubwa kwa mustakabali wa vijana wa Tanzania. Ikiwa utekelezaji wake utafanyika kwa ufanisi, nchi inaweza kushuhudia ongezeko la vijana wenye ujuzi wa kujiajiri na kusaidia katika maendeleo ya viwanda. Hii ni fursa adhimu ya kuhakikisha kuwa elimu sio tu ya nadharia, bali inaleta matokeo halisi kwa jamii.
