Msemaji wa jeshi la Ufaransa siku ya Jumatano alisema kuwa ushirikiano wowote na Niger katika nyanja za maendeleo na misaada ya kifedha na ushirikiano wa kijeshi umesitishwa hadi ilani nyingine.
Maoni yake yalikuja wakati mataifa kote ulimwenguni yakijibu mapinduzi ya kijeshi nchini humo ambayo yalishuhudia wanajeshi wakimshikilia Rais aliyechaguliwa kidemokrasia Mohamed Bazoum na kunyakua mamlaka.
Kanali Pierre Gaudilliere alisema kuwa makubaliano yote ya kijeshi yamefanywa na mamlaka iliyochaguliwa kwa njia ya kidemokrasia nchini Niger na yamesitishwa wakati mamlaka haya hayakuwa madarakani.
Gaudilliere alielezea ushirikiano huo kuwa wenye mafanikio hasa katika kupambana na ugaidi na kuwawezesha wakulima wanaonyanyaswa na makundi ya kigaidi kuanza tena shughuli zao, dhamira kuu ya kutumwa kwa Ufaransa.
Aliongeza pia wanasaidia wakazi wa eneo hilo, kusaidia miradi kama vile kuchimba visima kwa ajili ya kupata maji, kujenga shule na kutoa chakula au usambazaji wa maji.
Jumuiya ya kanda ya Afrika Magharibi ECOWAS imetishia kutumia nguvu kuirejesha Bazoum madarakani, lakini serikali zinazotawaliwa na kijeshi za majirani wawili wa Niger zimeungana na viongozi wa mapinduzi na kuonya kwamba watazingatia uingiliaji kati wowote kama kitendo cha vita.
Mkutano wa siku mbili wa wakuu wa ulinzi wa jumuiya hiyo yenye wanachama 15 ulifunguliwa Jumatano katika mji mkuu wa Nigeria kujadili hatua zinazofuata.
Gaudilliere alisema maafisa wa Ufaransa watakuwa wakifuatilia mazungumzo hayo “kwa karibu sana”.
