Watoto wanakabiliwa na hali ya “janga” huko Gaza, huku wazazi wakibaki bila chaguo ila kuwapa maji ya chumvi, kulingana na shirika la Umoja wa Mataifa la kutoa misaada kwa watoto Unicef.
Toby Fricker, msemaji wa bodi hiyo, aliambia BBC kwamba uhaba uliokuwepo Gaza hata kabla ya mzozo wa sasa “kupandishwa kwa kiwango kingine”.
“Mmoja wa wafanyikazi wetu, ana mtoto wa miaka minne, wa miaka saba, na anajaribu tu kuwaweka wasichana salama, kuwaweka hai kila siku,” alisema.
“Alizungumza kuhusu jinsi wanavyokunywa maji ya chumvi, na binti yake akisema, ‘Mama, kwa nini nisipate maji ya kawaida tuliyokuwa tukiyapata siku za kawaida?’
Alipoulizwa kuhusu vifaa vya msaada ambavyo sasa vimeweza kuingia Gaza, Fricker alisema: “Kumekuwa na vifaa, lakini ni kidogo sana.
“Unapoona mahitaji makubwa tuliyo nayo, kunahitajika kuwa mengi, mengi, mengi zaidi.”
Fricker alitoa wito wa “kusitishwa mara moja kwa mapigano ya kibinadamu” na kuongezwa kwa misaada katika Gaza “katika misingi endelevu”.
“Tunachoona sasa kila siku ni kwamba watoto wanauawa, watoto wanajeruhiwa, wanalemazwa,” alisema.
“Na hilo ndilo jambo la kwanza – kulinda maisha ya watoto na kuwaweka hai watoto.”
