Wizara ya Madini imepata fursa muhimu ya kutangaza Madini ya Lithium na Madini mengine Mkakati ambayo nchi imebarikiwa kuwa nayo katika Kongamano la LithiumDays23 linalofanyika kila mwaka mjini Halle nchini Ujerumani.
Katika kongamano hilo, Tanzania imepewa heshima ya kushiriki kwa njia ya mtandao na ana kwa ana ambapo Mkurugenzi wa Sera na Mipango Wizara ya Madini Augustine Olal kwa niaba ya Katibu Mkuu amewaongoza Wataalamu wa Wizara kushiriki kwa njia ya mtandao kutoka Mji wa Serikali Mtumba, jijini Dodoma.
Aidha, katika kongamano hilo, Tanzania imepata nafasi muhimu ya kujitangaza kama nchi ijayo mshirika wa LithiumDays24 na mwandaaji mwenza wa kongamano hilo.
Akitoa wasilisho katika kongamano hilo, Olal amesema nchi ya Tanzania inao utajiri wa urithi wa kijiolojia unaofanana na nchi ya Congo DRC ambayo ni mzalishaji mkubwa wa madini muhimu na mkakati na kueleza kwamba, hiyo ni kiashiria tosha kuwa Tanzania inaweza kuwa mzalishaji mkubwa wa madini hayo ambayo kwa kiasi kikubwa bado hayajaguswa. Hivyo, uwekezaji unahitajika katika kutafiti na kuchimba madini hayo.
‘’Amana kubwa za madini ya lithium nchini Tanzania pamoja na akiba kubwa ya madini ya kobati na nikeli zinaiweka Tanzania kama mdau wa kimkakati katika mnyororo wa kimataifa wa mzalishaji wa madini kwa ajili ya magari ya kutumia umeme na suluhu ya nishati safi,’’ amesisitiza Olal.
Amewahakikishia kuwa, Serikali inayo dhamira ya dhati katika kukuza mazingira rafiki ya uwekezaji na inashiriki kikamilifu katika mageuzi ya Sera na maendeleo ya miundombinu ili kuwezesha uchimbaji wa madini hayo muhimu.
Pia, Olal ameongeza kuwa, kutokana na amani iliyopo nchini na usalama ni hakikisho tosha kwamba Tanzania ni sehemu salama ya kuwekeza katika Ukanda wa Afrika Mashariki na kusema inayo heshima kubwa kuwa sehemu ya kongamano hilo na inatazamia kuwa mshirika muhimu katika uendelezaji wa madini hayo.
Awali, akimkaribisha Kaimu Katibu Mkuu kutoa wasilisho katika kongamano hilo, mwandaaji mwenza wa kongamano hilo kutoka Taasisi ya Teknolojia
