NIPASHE
Katibu Mkuu wa Chama Cha Mapinduzi (CCM), Abdulrahman Kinana, amewataka wananchi waliowekewa alama ya `X’ katika nyumba zao kwa muda mrefu bila kulipwa fidia kuzifuta hadi serikali itakapowalipa stahiki zao.
Kinana alitoa kauli hiyo wakati akihutubia mkutano wa hadhara uliofanyika uwanja wa Shule ya Msingi Ngaramtoni Jimbo la Arumeru Magharibi mkoani Arusha ikiwa ni sehemu ya ziara ya kukagua utekelezaji wa Ilani ya CCM.
“Wananchi wanakaa na hofu kwa muda wote wakati serikali haiwalipi haki zao wala kuwapelekea maendeleo na matokeo yake wanaishia kudhulumiwa,” Kinana.
Alisema serikali ikitaka kutengeneza barabara kwanza itafute fedha, kama fedha hakuna basi waondoe alama za `X’ walizoweka kwenye nyumba za wananchi.
“Haya mambo ya upembuzi yakinifu, mchakato na tupo mbioni kuleta fedha…ni mazingaombwe ambayo sasa yafikie mwisho. Mimi nasema kawekeni chokaa mpaka mtakapolipwa fedha zenu na wakija waambieni tangu miaka mitatu iliyopita gharama za ujenzi zimeongezeka wawaongeze kidogo,” Kinana.
Alisema haiwezekani mchakato wa kujenga barabara ukae kwa zaidi ya miaka mitatu.
Kwa upande wake, Katibu wa Halmashauri Kuu ya CCM, Itikadi na Uenezi, Nape Nnauye, alisema vyama vya upinzani vimeonyesha dalili ya kufa kutokana na kukumbatia vurugu na kuwataka wananchi kuingia mitaani hata kwa mambo yasiyo na maana.
“Mfano nchi mbili za Libya na Misri, wapinzani waliwahadaa vijana waingie mitaani kwa ahadi ya maisha bora, lakini kinachotokea sasa hivi katika nchi hizo ni kinyume chake,”Nape.
NIPASHE
Serikali haijawasilisha kwenye ofisi za Bunge miswada ikiwamo ya vyombo vya habari ambayo itasomwa na kujadiliwa kwenye vikao vya Bunge vinavyoendelea mjini hapa.
Taarifa za uhakika zinaeleza kuwa si Ofisi ya Katibu wa Bunge wala wabunge wenye miswada hiyo.
Ofisa Habari wa Bunge, Prosper Minja, alisema Bunge halijapata nakala za miswada ya sheria ya kupata habari wa mwaka 2015 na ule wa sheria ya vyombo vya habari wa mwaka 2015, ambayo yote imepangwa kuwasilishwa Ijumaa ijayo kwa hati ya dharura.
Kwa mujibu wa ratiba ya Mkutano huu wa Bunge, miswada hiyo itasomwa kwa mara ya kwanza na kupitishwa kwenye hatua zake zote siku hiyo hiyo.
Minja alisema bado wanasubiri serikali iwasilishe miswada hiyo ndipo waandishi wa habari wanaweza kupata akieleza kuwa haipo hata kwenye idara ya kumbukumbu rasmi za Bunge.
Nayo Kambi Rasmi ya Upinzani Bungeni imesema bado haijapata nakala za miswada hiyo licha ya kwamba inapaswa kuipata ili iweze kuandika maoni ya kambi hiyo kwa mujibu wa kanuni za Bunge.
Msemaji wa Kambi hiyo katika Wizara ya Katiba na Sheria, Tundu Lissu, alisema hata yeye anaitafuta miswada hiyo, lakini hajaipata.
Spika wa Bunge, Anne Makinda, alisema hajapata hati za dharura za kuwasilishwa kwa miswada hiyo. Makinda alilazimika kueleza hayo alipokuwa akimjibu mbunge wa Chonga (CUF), Haroub Muhammed Shamsi, aliyekuwa akiuliza swali kwa Wizara ya Habari, Vijana, Utamaduni na Michezo.
Miswada hiyo inawasilishwa wakati wadau wa tasnia ya habari wakiwa na hofu kwa kuwa hawajashirikishwa hivyo kutoshirikishwa kwao kunaweza kusababisha kutungwa sheria za kuathiri sekta ya habari.
Wadau wana wasiwasi kuwa miswada hiyo imekwishakamilika na wadau wa habari hawatakuwa na fursa yoyote ya kushirikishwa kuutolea maoni kwa lengo la kuuboresha.
Hata hivyo, kuwasilishwa kwa muswada huo kunaweza kuleta furaha au kiama kwa wadau wa habari kutokana na wadau kutoshirikishwa katika kuuandaa.
Kulingana na taratibu, kabla ya muswada huo kuwasilishwa bungeni, wadau wa habari wanatakiwa kushirikishwa katika mchakato mzima, lakini katika mchakato wa Muswada wa Sheria ya Vyombo vya Habari wa mwaka 2015 ha wa haki ya kupata habari mwaka 15, serikali haijafanya jitihada za kushirikisha wadau badala yake, umeandaliwa na Wizara ya Habari, Vijana, Utamaduni na Michezo.
MWANANCHI
Pamoja na mpango wa Mbunge wa Kigoma Kaskazini, Zitto Kabwe kuliaga Bunge kukwama jana, Chama cha ACT- Tanzania kimetangaza kukamilisha maandalizi ya kumpokea mwanasiasa huyo kuanzia leo.
Mbunge huyo alipanga kuliaga bunge na alisema amekwishapata ruksa ya Spika kuwa angesimama bungeni kuwaaga wabunge na wanachama wa Chadema baada ya chama hicho kumtimua uanachama wake hivi karibuni, lakini ghafla mpango huo uliyeyuka kwa kile kilichoelezwa kuwa Spika amemkatalia.
Tangu kuanzishwa kwa chama hicho mwaka mmoja uliopita, Zitto amekuwa akihusishwa kukianzisha, hivyo kitendo chake cha kujiunga nacho kitahitimisha mjadala wa muda mrefu wa mashabiki wake waliokuwa wakihoji wapi ataelekea baada ya kung’olewa Chadema.
Akizungumza na gazeti hili jana, Katibu Mkuu wa ACT, Samsom Mgamba aliangua kicheko na bila kuuma maneno alisema: “Hahahaa… tutampokea kuanzia kesho (leo) na maandalizi yamekamilika.”
Alipotakiwa kueleza wapi mapokezi hayo yatafanyika alisema: “Hilo mbona liko wazi, yatafanyikia makoa makuu yetu (yapo Makumbusho, Dar es Salaam) lakini kwa taarifa zaidi tutawajuza.”
Zitto anaingia ACT ikiwa ni siku tisa kabla ya chama hicho kufanya uchaguzi wake mkuu, huku akitajwa kuwa ameandaliwa kushika wadhifa wa mwenyekiti kuendeleza harakati zake za siasa.
Hivi karibuni, chama hicho kilimvua uongozi aliyekuwa mwenyekiti mwanzilishi, Lucas Limbu kutokana na mgogoro uliokuwapo baina ya viongozi na kufanya nafasi hiyo kubaki wazi.
Tayari washirika wa Zitto waliohusishwa naye kuandika waraka wa mapinduzi ndani ya Chadema na baadaye kufukuzwa uanachama, Mwigamba na Prof. Kitila Mkumbo wametua ndani ya chama hicho kipya.
Chama hicho ambacho kinaendelea na uchaguzi katika ngazi ya mikoa kikibakiza Mkoa wa Geita unaofanya uchaguzi wake kesho. Kitaanza vikao vyake vya kitaifa Machi 27 na kuhitimisha kwa mkutano mkuu Machi 29.
Akizungumzia uchaguzi huo, Mwigamba alisema: “Maandalizi yanakwenda vizuri na hakuna shaka utafanikiwa kwa kiasi kikubwa na tunawaomba Watanzania watuunge mkono.”
MWANANCHI
Serikali imeombwa kuingilia kati mgogoro unaoendelea baina yake na nchi jirani ya Kenya, kuhusu kuzuiliwa kwa magari ya Tanzania ya kusafirisha watalii kwenye Uwanja wa Ndege wa Kimataifa wa Jomo Kenyata ili kuleta usawa na ustawi wa sekta ya utalii kwa nchi zote mbili.
Akizungumzia athari zinazotokana na mgogoro huo jana, mfanyabiashara maarufu nchini, Vicent Laswai akipanda Mlima Kilimanjaro alisema, Serikali imekuwa ikipoteza watalii wengi kutokana na magari yanayotoka nchini kutoruhusiwa kuingia katika uwanja huo wa ndege.
Alisema suala hilo linaweza kuchangia kwa kiasi kikubwa kupoteza mapato yanayotokana na utalii pamoja na kudidimiza sekta hiyo.
“Ingawa kunahitajika tafakuri ya kina kuhusu faida na hasara za mgogoro huo kwa Tanzania, kuna kila sababu Serikali yetu, ikaamka usingizini kwa kuwa wenzetu, wanaweza kutumia fursa hii kuendelea kujitanua na kuua ushindani wa kisekta… Ni vizuri ukatatuliwa haraka ili kutoa nafasi kwa wadau kuendelea na malengo ya kuvutia kimataifa,” Laswai.
Mkurugenzi Mtendaji wa Kampuni ya Marenga Investment, Joseph Kimoso alisema mgogoro huo, unahitaji ufumbuzi wa haraka.
Kisomo alisema ni vyema Watanzania waanze kutembelea vivutio vya utalii vilivyopo nchini ili kuliingizia taifa kipato, pamoja na mamlaka husika kuanzisha vilabu maalumu vya utalii.
Mkuu wa Idara ya Utalii ya Hifadhi ya Taifa ya Mlima Kilimanjaro (Kinapa), Eva Mallya akitoa taarifa yake, alisema mkakati endelevu wa Taifa unaolenga kuongeza idadi ya Watanzania kutembelea hifadhi nchini umeanza kuleta tija.
MTANZANIA
Ifikapo Julai Mosi mwaka huu endapo mwanao atabainika kuwa na silaha bandia (mwanasesere) atakuwa amefanya kosa la jinai, kwa vile Muswada wa Sheria ya Usimamizi na Udhibiti wa Silaha na Risasi umepiga marufuku uingizwaji na matumizi yake nchini.
Muswada huo uliopitishwa na Bunge jana utaanza kutumika Julai mwaka huu, pamoja na mambo mengine, unalenga kuziba mianya ya kuingiza silaha bandia nchini.
Mbali na hilo, Muswada huo unasema mtu akibainika kuwa ni mlevi hatakuwa na sifa ya kumiliki silaha.
Pia muswada huo unataja moja ya sifa za kumiliki silaha kuwa ni mtu na umri wa miaka 25 na kuendelea. Sheria ya sasa ilikuwa haijaainisha ni umri gani ambao mtu anatakiwa kumiliki silaha.
Akisoma kwa mara ya pili muswada huo jana, Naibu Waziri wa Mambo ya Ndani ya Nchi, Pereira Silima, alisema moja ya sababu ya kutungwa kwa sheria hiyo ni kutoainishwa vema silaha zinazoweza kumilikiwa na raia.
Alisema sababu nyingine ni kutobainishwa kwa utaratibu wa kuweka alama kwenye silaha kisheria.
Silima alisema pia kuwa tangu mwaka 2003 hadi 2013 serikali imeteketeza silaha mbalimbali 28,380.
Akisoma maoni ya Kamati ya Kudumu ya Bunge ya Ulinzi na Usalama, Kapteni John Chiligati, alisema kutokana na ongezeko la uhalifu wa kutumia silaha, adhabu iliyopendekezwa na serikali irekebishwe.
“Kifungu cha 20 (2) kinatoa adhabu ya kulipa faini ya Sh milioni 10 au kutumikia kifungo cha miaka mitano au vyote kwa pamoja kwa mtu anayetiwa hatiani kwa kosa la kumiliki silaha kinyume cha sheria,”alisema.
Naye msemaji wa Kambi ya Upinzani Bungeni, Godbless Lema, alisema mbali ya kutungwa sheria kali, serikali inapaswa kuzingatia misingi ya utawala bora, haki, usawa, ukweli na ustawi wa jamii kulinda amani na utulivu nchini.
HABARILEO
Baadhi ya wabunge wameitaka Serikali kuona umuhimu wa kuwawekea ulinzi wabunge na viongozi wengine wa Serikali bila upendeleo, kwa kuwa wanaishi katika maisha ya hofu na hatarishi.
Pamoja na hayo, wabunge hao pia wameitaka Serikali kuanza kuchukua tahadhari hasa katika kipindi cha uchaguzi kwa kuhakikisha inadhibiti matukio yoyote ya uhalifu, ikiwemo matumizi ya silaha dhidi ya wananchi, wagombea na viongozi.
Wabunge hao walikuwa wakiwasilisha maoni yao bungeni mjini Dodoma jana wakati wakichangia mjadala wa Muswada wa Sheria ya Usimamizi na Udhibiti wa Silaha na Risasi wa mwaka 2014.
Mbunge wa Arusha Mjini, Godbelss Lema (Chadema) ambaye pia ni Msemaji wa Kambi ya Upinzani katika Wizara ya Mambo ya Ndani ya Nchi, alisema kutokana na kazi ya kufichua mambo mengi yanayoigusa jamii, ni vyema Serikali ikafikiria kuweka ulinzi katika nyumba za wabunge.
Alisema hata Mbunge wa Kigoma Kusini, David Kafulila aliyeibua sakata la Tegeta Esrow lililowandoa baadhi ya mawaziri na viongozi wengine wa Serikali madarakani, kwa sasa anaishi kwa hofu kutokana na kukosa ulinzi.
Mbunge wa Korogwe Vijijini, Stephen Ngonyani (CCM) alisema wakati umefika kwa Serikali kuona umuhimu wa kuwapatia ulinzi wabunge, ikiwa ni pamoja na kuwaruhusu kumiliki silaha ili waweze kujilinda.
Aidha, Ngonyani maarufu kama Profesa Majimarefu kutokana na shughuli zake za uganga wa asili, aliitaka Serikali kuanza kuchukua hatua mara moja ya kusajili silaha zote zinazomilikiwa kwa sasa ili kutambua upya vigezo na uhalali wa wamiliki wake kwa kuwa vitendo vya kibabe na uhalifu wa kutumia silaha, vimekithiri mitaani.
“Siku hizi ni jambo la kawaida kumkuta mtoto wa kiongozi akitishia watu baa au kwenye maeneo ya starehe pamoja na mitaani na silaha yake,” alisema. Mbunge wa Vunjo, Augustine Mrema (TLP) alisema iko haja kwa Serikali kufanya uchunguzi dhidi ya wamiliki silaha wakiwemo wawekezaji, kwani kumekuwepo matukio ya kupigwa hovyo risasi hewani na kutishiana kwa silaha ili tu kuonyeshana ubabe.
HABARILEO
Viongozi wa Afrika wametakiwa kubuni mikakati itakayowawezesha wananchi wote kushiriki katika shughuli za kimaendeleo.
Kauli hiyo ilitolewa na Rais mstaafu wa Awamu ya Tatu, Benjamin Mkapa wakati wa mjadala wa Kumbukumbu za Hayati Baba wa Taifa, Mwalimu Julius Nyerere zilizohifadhiwa kwenye chumba maalumu kilichopewa jina la Kavazi ndani ya ukumbi wa Costech katika Tume ya Sayansi na Teknolojia.
Alisema viongozi wa Afrika hawana budi kubuni miradi inayotoa fursa kwa wananchi wote kushiriki moja kwa moja katika shughuli za kiuchumi na kimaendeleo kama ilivyokuwa wakati wa siasa ya ujamaa na kujitegemea hapa Tanzania.
Alieleza kuwa njia mojawapo ya kufanikisha azma hiyo ni kuwamilikisha ardhi wananchi na kuwawezesha kuitumia kama rasilimali ya kuzalisha chakula cha kutosha na ziada kwa ajili ya shughuli za kibiashara.
Ni halali yako kupata kila stori inayonifikia mtu wangu, niko tayari kukutumia wakati wowote kupitia twitter instagram na facebook ukijiunga na mimi kwa kubonyeza >>> twitter Insta Facebook
