Rashidi Maharagande (21), Mkazi wa Sultan Area Manispaa ya Morogoro ameuawa kwa kuchomwa kisu shingoni na Richard Chamzila (23)chanzo kikitajwa kuwa ni wivu wa kimapenzi.
Tukio Hilo limetokea katika Kitongoji cha Temetero Kata ya
Kiroka Morogoro Vijijini majira ya saa nane usiku wa kuamkia September 17,2022.
Mwenyekiti wa Kitongoji hicho Banzi Bonzo amesema “Siku ya tukio Rashid alisafiri kutoka Morogoro Mjini hadi katika Kitongoji hicho kisha kwenda kulala nyumbani kwa Salipina Thomas (20), usiku wakiwa wamelala ndipo Mtuhumiwa Richard Chamzila ambaye alikuwa Mzazi wenza wa Saraphina aliwavamia katika nyumba hiyo Kisha kumchoma kisu shingoni Rashid”
Kamanda wa Polisi Mkoa wa Morogoro Fortunatus Musilimu amethibitisha kutokea kwa tukio hilo ambapo amesema kwa sasa wanamsaka Mtuhumiwa ambaye baada ya kuua aliubeba mwili wa Marehemu na kuutupa umbali wa mita 100 kutoka eneo alipofanyia tukio.
