NIPASHE
Zaidi ya abiria 1,000 wa treni ya abiria waliokuwa wakielekea Dar es Salaam, jana walikwama kuendelea na safari yao kutokana na reli kusombwa na mafuriko katika stesheni ya Kidete na Mzaganza.
Abiria hao walikwama mjini Dodoma wakitokea Mikoa ya Kigoma, Mwanza na Tabora wakielekea Dar es Salaam na Morogoro.
Kufuatia hali hiyo, uongozi wa Kampuni ya Reli Tanzania (TRL), ulilazimika kukodi mabasi 17 kwa ajili ya kuwasafirisha abiria hao kwenda Dar es Salaam.
Mkuu wa usafirishaji abiria na mizigo Dodoma, Haruna Mwano, alithibitisha kukwama kwa abiria hao huku akisema uongozi wa TRL umeshafanya utaratibu ili abiria hao waendelee na safari.
“Ni kweli abiria takriban 1,090 wameshindwa kusafiri ni wa kutoka Mikoa ya Kigoma, Mwanza na Tabora kuelekea Morogoro na Dar es Salaam na wamekwama katika stesheni ya Dodoma kutokana na reli kusombwa na mafuriko,” alisema Mwano.
Alifafanua kuwa abiria hao walianza safari juzi jioni na wamerudishiwa fedha ya chakula ili wajikimu wawapo njiani kuelekea Dar es Salaam.
Alisema wametumia mabasi 17 kusafirisha abiria hao na bado hajajua huduma zitarejea lini katika hali yake ya kawaida.
Wakati huo huo, uongozi wa TRL, umetangaza kusitisha kwa muda kuanzia Januari mosi, mwaka huu kutoa huduma zake za usafiri baada ya eneo la reli kati ya Kilosa mkoani Morogoro na Gulwe mkoani Dodoma kutokana na tuta la reli kukumbwa na mafuriko.
Kwa mujibu wa taarifa iliyotolewa na Kaimu Mkurugenzi Mtendaji wa TRL, Mhandisi Elias Mshana, taarifa za kiufundi eneo lililoathiriwa na mafuriko ni kubwa, hivyo wahandisi na mafundi wa TRL wako eneo la mafuriko kutathmini ukubwa wa kazi yenyewe.
Aidha, ilisema uongozi utatoa taarifa kamili kuhusu lini huduma za TRL kwenda bara zitaanza tena.
HABARILEO
Jumuiya ya Wazazi ya Chama Cha Mapinduzi (CCM) inakusudia kuwafikisha wakuu wa shule zake 15 kwenye vyombo vya sheria kutokana na madai ya ubadhirifu wa fedha.
Akizungumza jana jijini Dar es SaIaam, Mwenyekiti wa Jumuiya hiyo, Abdallah Bulembo alisema zaidi ya shule 26 walizozifanyia ukaguzi, 15 zimekutwa zikiwa na upungufu na kubwa ikiwa ni pamoja na ubadhirifu wa fedha.
“Katika ukaguzi tulioufanya, tumebaini tatizo kubwa kwenye matumizi, watu wamegeuza shule kuwa kichaka cha kutafuna fedha, sasa hawa tutawafikisha kwenye vyombo vya sheria,” alisema Bulembo.
Alitoa mfano wa walimu wa shule za Tegeta, Tabata na Mwembe Tongwa ambao wameshafikishwa mahakamani kutokana na ubadhirifu. Aidha, Bulembo alisema taasisi yake imejizatiti katika kuhakikisha inabaki katika soko la elimu kwa kuimarisha na kutoa elimu bora katika shule wanazomiliki.
“ Kwa sasa Serikali imejipanga kuboresha shule zake, hivyo kutakuwa na ushindani wa kupata wanafunzi, ili tubakie kwenye soko ni lazima tuimarishe shule zetu,” alisema. Bulembo alisema pia taasisi yake imejikita katika kuanzisha vyuo mbalimbali vya elimu ya juu kwa fani mbalimbali ikiwamo kozi ya ualimu.
Akizungumzia ada elekezi, Bulembo alisema anaamini serikali itakuja na ada elekezi ambayo inaendana na wakati uliopo kwani kuendesha shule kuna gharama nyingi ambazo mzazi anachangia kupitia ada.
Serikali pamoja na kufuta ada kwa shule inazozimiliki kuanzia shule za msingi hadi kidato cha nne, inakusudia kuja na ada elekezi kwa shule binafsi lengo likiwa ni kuwapunguzia mzigo wananchi.
HABARILEO
Wadau wa masuala ya siasa nchini wameeleza kuridhishwa na uteuzi wa idadi kubwa ya makatibu wakuu huku wakisisitiza kwamba Rais John Magufuli apewe muda pamoja na Baraza lake la Mawaziri wafanye kazi hatimaye wapimwe kwa ufanisi wao na si kwa ukubwa au udogo wa baraza.
Wakizungumza kwa nyakati tofauti na gazeti hili, watu wa kada tofauti wakiwemo wasomi na wanasiasa wamesema kitendo cha Magufuli kuteua watendaji wengi ni cha kupongezwa kwani amelenga kuleta ufanisi.
Kauli hizo za kuunga mkono uteuzi wa makatibu wakuu 27 walioapishwa Januari mosi mwaka huu kuongoza wizara 19, zimekuja huku kukiwa na baadhi ya watu wanaokosoa kwa kudai Rais Magufuli hakupunguza ukubwa wa serikali bali ameongeza kutokana na kuwa na makatibu wakuu wengi.
Aliyekuwa Naibu Waziri katika Serikali ya Awamu ya Nne, Dk Makongoro Mahanga alikaririwa na baadhi ya vyombo vya habari akikosoa uteuzi huo, akidai Rais Magufuli ameunda serikali yenye wizara 27 tofauti na wizara 19 alizotangaza huku akisisitiza kuwa baraza lake la mawaziri ni kubwa.
Katibu Mkuu Kiongozi, Balozi Ombeni Sefue akizungumza na waandishi wetu, alieleza kushangazwa na mwanasiasa huyo (ambaye sasa yuko upinzani) kutoelewa kwamba makatibu wakuu si sehemu ya Baraza la Mawaziri. “Sidhani kama kuna haja ya kumjibu.
Mtu aliyekuwa Naibu Waziri kwa muda mrefu sana, inashangaza hajui kuwa makatibu wakuu si sehemu ya Baraza la Mawaziri. Hivyo idadi yao si kipimo cha ukubwa au udogo wa baraza la mawaziri,” alisema.
Alisema, “hata wewe ukijumlisha idadi ya makatibu wakuu na naibu makatibu wakuu waliokuwepo serikali iliyopita na waliopo sasa utaona kuwa jumla yao ni wachache sasa kuliko kabla.” Kwa mujibu wa Balozi Sefue, jumla ya makatibu wakuu wa Serikali iliyopita walikuwa 54.
Rais apongezwe Mhadhiri wa Chuo Kikuu cha Mzumbe na aliyewahi kuwa Makamu Mkuu wa chuo hicho, Profesa Joseph Kuzilwa, alisema kitendo cha Rais Magufuli kuteua watendaji wengi ni cha kupongezwa kwani amelenga kuleta ufanisi.
“Hii nchi ni kubwa na ina vitu vingi vya kusimamiwa hivyo kuteua idadi kubwa ya watendaji kwa maana ya makatibu wakuu ni sahihi kwani wao ndio wasimamizi wakuu wa sekta mbalimbali zilizo chini ya wizara husika,” alisema Profesa Kuzilwa.
Profesa Kuzilwa alisema suala si ukubwa wa baraza au serikali, bali Rais amelenga kuwa na serikali ambayo itakuwa na ufanisi mkubwa na kuleta matokeo sahihi ya utendaji. Alisema kuwa na makatibu wakuu ambao wengi wao ni wataalamu watamsaidia zaidi rais kusimamia kazi za serikali kikamilifu.
Mhadhiri wa Chuo Kikuu cha Dar es Salaam (UDSM), Kitivo cha Siasa na Utawala, Dk Benson Bana alisema katika fani ya utawala, haiwezekani kutumia hoja ya idadi ya makatibu wakuu kupima ukubwa au udogo wa serikali.
Dk Bala alisema pia aliyetoa hoja ya kukosoa, ambaye ni naibu waziri wa zamani, hawezi kutoa hoja iliyo katika mizani kwa kuwa ni majeruhi wa kisiasa aliyekuwa serikalini na sasa yuko kwenye upinzani.
Alisema muundo wa serikali huwa unabadilika mara kwa mara na jambo la msingi ni kuwa na watu bora wa kusaidia serikali katika kutatua matatizo ya wananchi. Acheni fitina Mwenyekiti wa Chama cha Tanzania Labour (TLP), Augustine Mrema, aliwataka Watanzania wampe Rais Magufuli muda wa kuwatumikia kwa kuunda serikali ambayo anadhani itakuwa na tija kwa taifa.
“Naomba Watanzania tumpe Rais John Magufuli miezi sita, tuache fitina na majungu na kuanza kukosoa kosoa vitu,” alisema Mrema. Mrema alisema kuwa nchi imepata Rais mzuri na makini kwani anaongoza nchi vizuri na matokeo tumeanza kuyaona kwa kipindi kifupi kwa kudhibiti ufisadi na wizi katika maeneo mbalimbali.
Alisema Rais aachwe aunde serikali ambayo anadhani itamsaidia katika kuwaletea wananchi maendeleo na kupambana na ufisadi uliokithiri nchini, vitendo vya rushwa na hata majambazi. “Makatibu wakuu ndiyo wasimamizi wa sekali kwa ujumla,” alisema.
Mrema alisema awali walikuwa wakilalamikia ukubwa wa Baraza la Mawaziri kutokana na kukosa fedha za kulipa lakini hivi sasa matokeo yanaonesha ni mazuri kwa udhibiti wa mianya ya rushwa.
Kwa upande wake, Rais wa East Africa Bureau, Paul Mashauri, alishauri Watanzania kuwa na imani na rais na uteuzi anaoufanya kwa kuwa unalenga katika ufanisi. “Bila kujali ni baraza la namna gani, rais ameliunda lakini kubwa ambalo tunatakiwa kuliangalia ni ufanisi utakao tokana na baraza hilo pamoja na watendaji wake,” alisema Mashauri.
Awali, Dk Makongoro ambaye alihama CCM baada ya kushindwa kwenye kura za maoni, na kuingia Chadema, alikaririwa na vyombo vya habari akidai kwamba si kweli kwamba Rais Magufuli amepunguza ukubwa wa serikali bali ameongeza.
“Sina hakika kama wasaidizi wa rais wamemshauri na kumweleza kwamba wizara si ofisi ya waziri bali wizara ni ofisi ya Katibu Mkuu (mtendaji mkuu, afisa masuhuli). Mtendaji mkuu ndiye mwenye dhamana.
Ndiyo maana hata katika ngazi ya kata, ofisi ile inaitwa Ofisi ya Ofisa Mtendaji wa kata siyo ofisi ya Diwani,” Mahanga alinukuliwa. Alidai kwamba, ukubwa wa serikali hautegemei sana wingi wa mawaziri bali wingi wa makatibu wakuu huku akisema ahadi ya Rais Magufuli kwenye kampeni kwamba ataunda serikali ndogo hakuitimiza.
HABARILEO
Wizara ya Elimu, Sayansi, Teknolojia na Ufundi imeteua shule sita za sekondari nchini kuingia katika mpango maalumu wa wanafunzi wake kufundishwa somo la lugha ya Kichina kuanzia mwaka huu.
Kutokana na uamuzi huo, walimu 12 kutoka China wamekamilisha utaratibu wa mpango kazi wa namna ya ufundishaji wa somo hilo kwa shule zilizoteuliwa mara zitakapofunguliwa rasmi mwezi huu.
Ofisa Elimu Mkuu wa Wizara ya Elimu, Sayansi, Teknolojia na Ufundi, Salum Salum, alitaja shule zilizoingizwa kwenye mpango huo katika awamu ya kwanza ni Benjamin Mkapa na Chang’ombe (Dar es Salaam), Msalato na Dodoma (Dodoma), Morogoro na Kilakala za mkoani Morogoro.
Salum alitoa taarifa hiyo juzi wakati akifungua mafunzo ya kazi na mipango mikakati iliyoandaliwa na Taasisi ya China inayojihusisha na lugha ya Kichina kwa walimu wake walioteuliwa kufundisha somo la lugha ya kichina katika shule hizo.
Alisema kabla ya kufunguliwa kwa shule, viongozi wa China wamekutana kwa siku mbili mjini Morogoro kufanya mafunzo ya kazi ya kujiandaa kuingia darasani baada ya shule kufunguliwa.
“Mafunzo kazini ni ya kujiandaa na kupeana mikakati na nini kifanyike kabla ya shule kufunguliwa ili kuingia madarasani kufundisha wanafunzi wa kitanzania lugha ya kichina,” alisema Ofisa Elimu Mkuu.
Alisema wanafunzi watatahiniwa somo hilo la lugha ya kichina katika mitihani yao na watakapohitimu watahesabiwa alama za ufaulu sawa na yalivyo masomo mengine yanayofundishwa katika shule za sekondari kama ilivyo kwa Kifaransa na Kijerumani.
Alisema wizara inaona ni njia nzuri kwa vijana wa Kitanzania kuwa na lugha ya mawasiliano katika kuwasaidia kujifunza zaidi na kutumia fursa zitakazopatikana China ikiwemo kujiendeleza na elimu ya juu zaidi.
Mkurugenzi wa Taasisi ya China ya lugha ya kichina, Ambar Zheng, kutoka katika Chuo Kikuu cha Dodoma (UDOM), alisema walimu 12 wa China wameshapatiwa mafunzo ya namna ya kufundisha somo hilo kwenye shule husika.
Alisema kila shule ya sekondari iliyoteuliwa katika mikoa hiyo ya Dodoma, Dar es Salaam na Morogoro, zitapangiwa walimu wawili kila moja kwa ajili ya kufundisha somo hilo kuanzia mwaka wa masomo unaoanza mwezi huu.
Alipongeza ushirikiano mzuri uliooneshwa kati ya Serikali ya Tanzania na China na wizara husika kuwezesha kuanzishwa kwa somo hilo katika baadhi ya shule za sekondari nchini. Makamu Mkuu wa Chuo Kikuu Cha Waislamu cha Morogoro, Profesa Hamza Njozi alipongeza Serikali ya China kwa kuendeleza ushirikiano katika nyanja mbalimbali, ikiwemo elimu ya vyuo vikuu.
HABARILEO
Watanzania wamehadharishwa kuendeleza siasa za majukwaani badala yake, wametakiwa kumwacha Rais John Magufuli afanye kazi yake na wamuunge mkono katika kuwabana wakwepa kodi.
Mwenyekiti wa Jumuiya ya Wazazi ya Chama Cha Mapinduzi (CCM), Abdallah Bulembo alitoa angalizo hilo jana wakati akizungumzia madai ya kuwapo kwa uonevu, vitisho na kuongezewa kodi kwa wafanyabiashara walioonekana kuunga mkono vyama vya upinzani.
Madai hayo yalitolewa na aliyekuwa mgombea wa urais kwa tiketi ya Chadema, Edward Lowassa. “Wakati wa siasa za majukwaani umeisha. Rais amepatikana aachwe afanye kazi, na ili afanya kazi yake vizuri ni lazima akusanye kodi na tusianze kudhoofisha kasi na utendaji wake kwa maneno kama haya,” alisema Bulembo.
Lowassa anadaiwa kusema hayo wakati wa ibada maalumu ya kukaribisha mwaka mpya iliyofanyika katika Kanisa la Kiinjili la Kilutheri Tanzania (KKKT) Usharika wa Monduli alipopewa nafasi ya kutoa neno la shukrani na kutoa salamu za mwaka mpya.
Alikaririwa akidai kuwa serikali imekuwa ikiwaandama wafanyabiashara na wananchi waliokuwa wakiunga mkono upinzani katika uchaguzi mkuu uliopita na kuwaambia wafuasi wake kwamba kazi ya kutafuta mabadiliko ndiyo kwanza imeanza.
Katika mkutano na waandishi wa habari jana jijini Dar es Salaam, Bulembo alimtaka mwanasiasa huyo kujitokeza hadharani na kutaja kwa majina, wafanyabiashara wanaodai kuongezewa kodi kutokana na kuwa wafadhili wa Chadema.
Alisema haitoshi kwa Lowassa kutoa malalamiko hayo kiujumla bila kubainisha watu hao kwani kwa kufanya hivyo, kutachangia mgongano kati ya Serikali na wafanyabiashara. Bulembo alisema kauli ya Lowassa pia imelenga kudhoofisa kasi na jitihada za Rais John Magufuli za kukusanya kodi na kudhibiti mianya ya ukwepaji kodi iliyokuwapo.
“Suala la kulipa kodi ni la wote wanaotakiwa kulipa kodi, bila kujali kama mtu huyo alisaidia au kufadhili CCM, CUF (Chama cha Wananchi) au Chadema. Kama unatakiwa kulipa kodi wewe lipa tu na suala la kukwepa kodi katika uongozi wa awamu ya tano halipo,” alisema.
Alisema wakati Rais Magufuli anaingia madarakani, Sh bilioni 850 zilikuwa zikikusanywa kwa mwezi na kwa muda mfupi wa kuwapo madarakani zaidi ya Sh trilioni moja zimekusanywa. Alisisitiza kuwa juhudi hizo ni lazima ziungwe mkono na Watanzania wanaopenda maendeleo ya nchi.
“Tunamtaka ajitokeze na kuwataja kwa majina watu wanaoonewa na kuongezewa kodi kubwa eti kwa sababu ni wafadhili wa Chadema, kauli kama hizi sio nzuri, zinalenga kuibua mgongano kati ya serikali na wafanyabiashara ambao ndio walipakodi,” alisema Bulembo.
Wakati Jumuiya ya Wazazi kupitia kwa Bulembo ikielezwa kukerwa na wanaoendeleza siasa za majukwaani, kutoka mkoani Arusha, inaripotiwa kuwa viongozi wa kimila wa kabila la Kimasai maarufu kwa jina la Laigwanani wa wilayani Monduli, wamemtaka Lowassa kumuunga mkono Rais Magufuli katika vita ya kupambana na ufisadi nchini.
Walisema hayo mjini Monduli mwishoni mwa wiki kwa waandishi wa habari baada ya mkutano wao uliolenga kuzungumzia masuala mbalimbali yakiwamo ya kimila. Akizungumza na waandishi wa habari kwa niaba ya viongozi hao wapatao 50 waliotajwa kutoka kwenye kata zote za Wilaya ya Monduli, Lota Sanare alisema viongozi hao wa kimila wamemtaka Lowassa aliyekuwa mbunge wao, kuunga mkono mkakati wa Magufuli wa ‘kutumbua majipu’ .
“Kama yeye Lowassa hawezi au hataki kumuunga mkono Rais Magufuli katika kutumbua majipu ya wakwepa kodi, wazembe, wabadhirifu wa mali ya umma na mafisadi, basi akae kimya amwache mwenzake (Rais Magufuli) awatumikie Watanzania kama alivyoahidi wakati wa kampeni za uchaguzi mkuu na si kulalamika ,”alisema Sanare.
Sanare alisema, “anachofanya Rais Magufuli na serikali ni kuwashughulikia wafanyabiashara wanaokwepa kodi, wawe CCM au Ukawa (umoja wa vyama vinne), sasa anapotokea mwanasiasa anapinga vita hiyo maana yake anaunga mkono ukwepaji kodi na huyo ni fisadi na adui mkubwa wa Watanzania.”
Alisema kodi na ushuru wa serikali ndiyo nguzo ya maendeleo ya nchi. Alisisitiza wanaokwepa kulipa kodi washughulikiwe bila kujali ni akina nani. “Lazima washughulikiwe hata awe nani, kwa mujibu wa sheria na sisi tunaunga mkono hatua zote zinazochukuliwa na serikali na tuko tayari kusaidiana nayo kuyatumbua yale majipu yaliyojificha huku kwetu,” alisisitiza Sanare.
Kauli ya viongozi hao wa kimila imekuja siku chache baada ya Lowassa kunukuliwa hivi karibuni akilalamika kanisani Monduli kwamba serikali inawaandama wafanyabiashara waliokuwa wakiunga mkono Ukawa.
MWANANCHI
Hali ya taharuki imeanza kuwakumba wateja wa taasisi za fedha nchini, hasa benki kutokana na kuibuka kwa matukio ya wateja kuporwa wanapotoka kuchukua fedha.
Katika siku za karibuni kumekuwapo na matukio ya watu mbalimbali kuporwa fedha na watu wenye silaha, ikiwa ni muda mfupi baada ya kutoka benki, hali ambayo inajenga wasiwasi juu ya sehemu ambazo majambazi hao hupata taarifa za watu wanaokwenda benki kuchukua fedha.
Wateja wa benki mbalimbali wanatupia lawama uongozi wa benki kwa kufumbia macho matumizi ya simu za mikononi ndani ya benki, huku ikihisiwa baadhi yao ndio ambao hutoa siri kwa majambazi.
Hofu miongoni mwa wateja ilizidi zaidi baada ya majambazi kumuua kwa risasi meneja wa operesheni wa Zantel, Gabriel Kamukala muda mfupi baada ya kuchukua Sh10 milioni benki.
Kamukala aliuawa Desemba 28 saa 4:00 asubuhi jijini Dar es Salaam na kumekuwapo na matukio ya aina hiyo katika miji mingine mikubwa kama Arusha, Mwanza na Moshi.
Jana kulikuwapo na ujumbe unaosambazwa katika mitandao ya kijamii, ukiwaonya wateja kutothubutu kuchukua fedha kupitia matawi ya benki zilizopo eneo moja jijini Dar es Salaam.
“Benki zote za (jina limehifadhiwa) zina majambazi. Wanakupiga picha na wahudumu wanawaeleza umebeba kiasi gani. Usipende kutoa pesa utakimbizwa na pikipiki,” unasema ujumbe huo.
Mkurugenzi wa kampuni ya Destination Travel ya mjini Moshi, Rogatus Lucas alisema uporaji wa fedha kwa wateja wanaotoka benki usipodhibitiwa, unaweza kuhamia mikoa mingine. Lucas alitaka sheria iwe ni msumeno, kama hairuhusiwi kutumia simu ukiwa ndani ya benki, basi agizo hilo litekelezwe na si kwa wateja tu hata watunza fedha ili kudhibiti kuvuja kwa siri.
“Tujiulize ni nani wanaotoa siri hizi? Kama baadhi ni wafanyakazi wa benki, basi wasiruhusiwe kutumia simu na kama ni wateja wazizime kabla ya kuingia benki,” alisisitiza Lucas. Mkurugenzi wa benki ya CRDB mkoani Kilimanjaro, Francis Mollel alitupia lawama wateja kuwa wanapuuza matangazo hayo. “Hata pale kwangu (tawi la Moshi) kuna matangazo, lakini utakuta bado mteja anaongea na simu.
Unawaambia tunazuia hii kwa faida yako, lakini hawakuelewi,” alisema Mollel. Mollel aliishauri Serikali kutunga sheria kali ya kuzuia matumizi ya simu ndani ya benki na pia mtu yeyote anayechukua kiwango kikubwa cha fedha iwe lazima kuomba ulinzi wa polisi.
Kwa mujibu wa Mollel, ujio wa huduma ya utoaji na uwekaji fedha benki kwa njia ya simu, Simbanking, unaweza kudhibiti uporaji wa fedha, akisema bado matumizi yake yako chini na kusisitiza kuwa huduma hiyo ni salama zaidi kwa miamala ya fedha.
Mfanyabiashara wa jijini Arusha, Nurdin Mahmood, alisema kumekuwa na wateja feki ndani ya benki wanaokaa kwa muda mrefu bila kuhitaji huduma yoyote. “Benki zinatakiwa ziwe makini sana na kufuatilia mienendo ya watu wa aina hii,” alisema.
Mmiliki wa kampuni ya mabasi ya Capricorn, George Mberesero alisema kuna ulegevu katika usimamizi wa kanuni za benki kutokana na baadhi ya wateja kuingia na silaha kwa kuwa hakuna ukaguzi. “Kuwepo na utaratibu wa polisi au walinzi kusimama mlangoni kuhakikisha mteja amezima simu yake au amekabidhi bastola yake, lakini siku hizi imekuwa ni holela. Watu wanaingia na silaha,” alisema.
MWANANCHI
Katibu Mkuu Kiongozi, Balozi Ombeni Sefue amesema ameshangazwa na kauli ya aliyekuwa Naibu Waziri wa Kazi na Ajira, Dk Makongoro Mahanga kuwa wingi wa makatibu wakuu unakinzana na dhana ya kupunguza ukubwa wa Serikali alioahidi Rais John Magufuli.
Akizungumza na Mwananchi juzi, mbunge huyo wa zamani wa jimbo la Segerea (CCM), mbali na kupongeza kazi inayofanywa na Rais, alisema kuteua makatibu wakuu 27 ni sawa na kuwa na wizara 27 badala ya 15 kama inavyoelezwa.
Dk Mahanga alisema huko si kupunguza ukubwa wa Serikali bali ni kuongeza ukubwa wake na kwamba wizara ni ofisi ya katibu mkuu na si ofisi ya waziri.
Lakini, Balozi Sefue alipotafutwa na gazeti hili kutoa ufafanuzi kuhusu madai ya Dk Mahanga, alisema kauli ya kiongozi huyo imemshangaza. “Kwa mtu aliyekuwa naibu waziri kwa muda mrefu sana, inashangaza hajui kuwa makatibu wakuu si sehemu ya Baraza la Mawaziri,” alisema Sefue.
“Idadi yao si kipimo cha ukubwa au udogo wa Baraza la Mawaziri,” alisema Balozi Sefue.
Sefue aliongeza kuwa idadi ya makatibu wakuu na naibu wao waliokuwapo kwenye Serikali iliyopita na waliopo sasa ni tofauti, kwa kuwa wamepungua. “Jumla ya makatibu wakuu na naibu makatibu wakuu wa Serikali iliyopita ilikuwa 54. Hivi sasa wako 49 tu,” alisema Sefue.
Ikumbukwe kuwa baada ya kupunguzwa kwa Baraza la Mawaziri kutoka mawaziri 55 wa baraza lililopita hadi mawaziri 34 wa baraza la sasa, hata nafasi za makatibu wa wizara zimepungua pia.
Rais alisema makatibu ambao hawajateuliwa, watapangiwa kazi nyingine. Kauli ya Dk Mahanga, ambayo pia aliituma kwenye ukurasa wake wa facebook, iliibua mjadala kwenye mitandao ya kijamii baada ya wananchi kugawanyika, baadhi wakimuunga mkono na wengine wakimkosoa.
MWANANCHI
CCM imesema kauli ya Waziri Mkuu wa zamani, Edward Lowassa kuwa wafadhili wa Chadema wananyanyaswa, ina lengo la kuichonganisha Serikali na walipa kodi na kumtaka ataje waliofanyiwa vitendo hivyo.
Juzi, Lowassa alikaririwa na vyombo vya habari kutoka Monduli akisema Mamlaka ya Mapato Tanzania (TRA) kwa maelekezo ya Serikali imekuwa ikiwatoza kodi kubwa wafanyabiashara kwa sababu waliifadhili Chadema kwenye kampeni za uchaguzi mkuu mwaka jana.
Lowassa aliwahi kutoa kauli kama hiyo jijini Mwanza akiwa kwenye msiba wa aliyekuwa mwenyekiti wa Chadema wa mkoa wa Geita, Alphonce Mawazo aliyeuawa kwa kushambuliwa kwa mapanga.
Pia wakati wa harambee ya Chadema iliyofanywa Septemba 22 mwaka jana, mwenyekiti wa chama hicho, Freeman Mbowe alisema kulikuwa na matajiri watano wenye uwezo kiuchumi ambao walikuwa tayari kukisaidia kwenye shughuli zake za kampeni, lakini hawataki kutajwa majina yao kwa hofu ya kufuatiliwa na vyombo vya dola.
Jana, akizungumza na waandishi wa habari jijini, Abdallah Bulembo, ambaye ni mwenyekiti wa Jumuiya ya Wazazi ya CCM, alisema kauli ya Lowassa haina ukweli wowote na kwamba ina lengo la kuigombanisha Serikali na walipakodi ambao wanahitajika sana kipindi hiki.
“Kama kweli Lowassa anawafahamu wafanyabiashara au kampuni ambazo zinatozwa kodi kubwa kwa sababu walikuwa wamekifadhili chama hicho, basi ni vizuri awataje ili wajulikane na waseme wao wenyewe,” alisema Bulembo ambaye wakati wa kampeni alikuwa bega kwa bega na mgombea urais wa CCM, Dk John Magufuli.
Akijibu suala hilo, Lowassa alisema kuna wafanyabiashara wengi waliokuwa wakikifadhili chama ambao wanalalamika kutozwa kodi kubwa.
“Kuna watu wengi wanalia kutozwa kodi kubwa,” alisema Lowassa ambaye aligombea urais kwa tiketi ya Chadema baada ya kuihama CCM Julai mwaka jana. “Suala hapa si kuwataja majina, mkihitaji majina yao fanyeni research (utafiti) mtawapata. Lakini mfahamu kwamba kuna tatizo hilo.”
Alisema ana uhakika vyombo vya habari vitawapata watu hao na kwa kuwa ni wengi watatoa malalamiko yao. Akifafanua zaidi, Bulembo alisema kauli ya Lowassa inadhoofisha nguvu ya Rais Magufuli ambaye ameongeza makusanyo ya kodi kutoka Sh850 alipoingia madarakani hadi Sh1.3 trilioni kwa mwezi.
“Tunawahitaji walipakodi wengi wakati huu kwani tunahitaji kupata fedha zaidi ili kutekeleza ahadi tulizowaahidi wananchi. Kauli ya Lowassa inatugombanisha na walipakodi,” alisema.
Alisema anachofahamu ni kwamba kodi inatozwa bila kumpendelea mfadhili wa CCM au kumwonea mfadhili wa Chadema. “Masuala ya vyama ya siasa yameshapita, sasa hivi ni kujenga nchi na kodi inatozwa bila kuangalia vyama vya siasa,” alisema Bulembo.
Alimwomba Lowassa kumsaidia Magufuli katika kazi ya kutafuta mapato ili kuwaletea wananchi maisha mazuri “Namwomba Lowassa tujenge nchi yetu, huu si wakati wa kufanya siasa, asubiri mwaka 2020 kama atagombea tena urais tutakutana kwenye majukwaa,” alisema.
Alisema kuendelea kupigana vijembe kipindi hiki ni kurudisha nyuma maendeleo ambayo yanahitaji zaidi walipakodi.
“Kodi zina vipimo vyake kama kuna watu wameonewa ukweli utajulikana,” alisema Bulembo ambaye pia ni mjumbe wa Kamati Kuu ya CCM. Alisema Serikali ya CCM itaendelea kutenda haki kwa wananchi wake ili kukiwezesha chama hicho kushinda uchaguzi kwa kishindo mwaka 2020.
Alipoulizwa kuhusu madai hayo, mkurugenzi wa idara ya elimu na huduma kwa walipakodi wa TRA, Richard Kayombo alisema mamlaka hiyo haijapata malalamiko yoyote.
Alisema mamlaka hiyo inafanya kazi kwa kufuata sheria na kanuni zilizowekwa na haifanyi kazi kwa kufuata maagizo ya vyama vya siasa. “Sisi hatuko kwenye siasa tunafanya kazi zetu kwa kuongozwa na sheria na kanuni. Hatumwonei mtu wala kupendelea,” alisema.
Kauli kama ya Lowassa ilitolewa pia na mkuu wa idara ya habari ya Chadema, Tumaini Makene aliyesema hoja ni kueleza kuwapo kwa tatizo ambalo halitaishia kwenye ubaguzi wa kiitikadi. “Ukianza kubagua watu kivyama, huwezi kuishia hapo. Utaanza kuwabagua kikabila, kikanda na hata kidini.
Hii ni kinyume na ahadi ya Rais Magufuli kuwa atakuwa Rais wa watu wote,” alisema Makene. Makene alitoa mfano wa kukataliwa kwa misaada ya vifaatiba katika zahanati za Serikali mkoani Kagera uliotolewa na mbunge wa Bukoba Mjini, Wilfred Lwakatare.
Mara baada ya kuingia Ikulu, Rais Magufuli alikutana na watumishi wa Hazina na kuwaelekeza kukusanya kodi bila ya kuangalia sura, huku Waziri Mkuu Kassim Majaliwa akifanya ziara za mara kwa mara bandarini ambako ameibua kashfa za ukwepaji kodi na upitishaji makontena kifisadi.
MWANANCHI
Sakata la bomoabomoa kwa wakazi wa mabondeni limechukua sura mpya baada ya mbunge wa Kinondoni (CUF), Maulid Mtulia kufungua kesi katika Mahakama ya Ardhi kupinga ubomoaji wa nyumba bila kutoa njia mbadala za makazi.
Kazi ya ubomoaji wa nyumba zilizojengwa mabondeni, maeneo ya wazi, kwenye kingo za mito na fukweni, ilisitishwa kwa muda hadi Januari 5, ukiwa ni mpango wa kuwapa muda wakazi kuhamisha vifaa vyao na kubomoa wenyewe nyumba zao, lakini sasa itakutana na kikwazo kipya.
Jana, mbunge huyo wa Kinondoni aliwaambia wanahabari kuwa shauri hilo linatarajiwa kusikilizwa leo na kitengo hicho cha ardhi cha Mahakama Kuu, Kanda ya Dar es Salaam kuanzia saa 4:00 asubuhi, na itasikilizwa na Jaji wa Mahakama Kuu, Kitengo cha Ardhi, Panterine Kente.
Alisema anachopinga ni kitendo cha Serikali kuwavunjia nyumba wakazi hao badala ya kuwahamishia eneo lenye usalama. “Serikali ingekuwa inawahamisha mimi sina tatizo kabisa.
Lakini unawavunjia makazi yao halafu haujui wataishi wapi na kuwaacha wanalala juu ya kifusi. Serikali ilitakiwa iwahamishie kwenye viwanja vilivyopimwa,” alisema Mtulia.
Mtulia alisema kesi hiyo iliyosajiliwa Desemba 28, 2015 itasimamiwa na wakili Abubakar Salim na kuwataka wakazi wa Kinondoni kujitokeza kuifuatilia.
Mratibu wa wenyeviti wa mitaa 18 inayoguswa na bomoabomoa hiyo, Godwin Cathberth alisema Serikali ingesitisha kuvunja nyumba hizo ili wakae chini na kuzungumza.
Alisema viongozi wa mitaa hawakupata taarifa rasmi za kuhamishwa kama ambavyo Serikali hufanya mawasiliano yake.
“Wanasema sisi tuhame ghafla tu wakati Serikali imejenga miundombinu ya gharama kubwa, kama kituo cha mabasi yaendayo kasi na moja ya majengo ya hospitali ya (Taasisi ya Mifupa ya Muhimbili) Moi.
Inapenda watumishi wake au wagonjwa wafe na mafuriko?” alisema Cathberth.
Waziri wa Nchi, Ofisi ya Makamu wa Rais, Muungano na Mazingira, January Makamba alisema hadi jana walikuwa hawajapokea zuio lolote la mahakama, hivyo operesheni hiyo itaendelea. kama ilivyotangazwa awali.
Alisema shauri kama hilo lilishapelekwa mahakamani miaka ya nyuma na mahakama ikaamua wahame na tayari kwa wiki kadhaa zilizopita watu wengi wameondoka wenyewe kama inavyotakiwa.
Alisema katika utekelezaji wa sheria ya usimamizi wa mazingira, mipango miji na misitu, Serikali haitamuonea mtu na uhakiki ulishafanywa kabla ya uamuzi wa kuwaondoa.
“Watu wote wanaoishi katika maeneo yasiyostahili wana taarifa ya muda mrefu kuwa wanatakiwa kuhama, si tu kwa sababu ya kukidhi sheria, bali kwa ajili ya kuokoa maisha yao pale mvua zinaponyesha,” alisema.
Unataka kutumiwa MSG za habari zote kubwa kutoka kwa Millard Ayo? ukiwa na line ya tiGO andika ‘AYO’ tuma kwenda 15510, msg utayotumiwa jibu OK ili uanze kupokea matukio yote kwa sms, pia ungana na Millard Ayo kwenye Twitter, FB, Instagram na YouTUBE wa kubonyezahapa>>>INSTAGRAM TWITTER FB YOUTUBE.
